🛑कुडाळात कुरिअर वाहन लुटीचा थरारक प्रयत्न.;सहा स्थानिक तरुणांवर दरोड्याचा गुन्हा दाखल.

🖋️लोकसंवाद /- कुडाळ.

कुडाळ तालुक्यातील पणदूर परिसरात मध्यरात्री कुरिअर कंटेनर लुटण्याचा थरारक प्रयत्न झाल्याची धक्कादायक घटना समोर आली असून, या प्रकरणी स्थानिक सहा तरुणांविरोधात दरोड्याचा गुन्हा दाखल करण्यात आला आहे. या घटनेदरम्यान कंटेनरचा चित्रपटासारखा पाठलाग, चालत्या वाहनावर दगडफेक आणि शेवटी शहरात झालेला भीषण अपघात यामुळे कुडाळ परिसरात भीतीचे वातावरण पसरले आहे.

उत्तर प्रदेशातील मिर्जापूर येथील रहिवासी असलेले कंटेनर चालक मनोज कुमार पाल (वय ३१) हे आपला कुरिअर कंटेनर घेऊन पणदूर परिसरातून जात असताना रात्री सुमारे १ वाजण्याच्या सुमारास एका बलेनो कारमधून आलेल्या तरुणांनी त्यांचा पाठलाग सुरू केला. लुटीच्या उद्देशाने कंटेनर अडवण्याचा प्रयत्न करण्यात आला. मात्र चालकाने प्रसंगावधान राखत वाहन न थांबवता वेगाने पुढे नेत जीव वाचवला.

चालक थांबत नसल्याने संतप्त झालेल्या आरोपींनी चालत्या कंटेनरवर दगडफेक केली. त्यानंतरही कंटेनरचा पाठलाग सुरूच ठेवण्यात आला. मात्र कुडाळ शहरात प्रवेश करताच आरोपींच्या बलेनो कारचा चालकाचा ताबा सुटला आणि गीता हॉटेलसमोरील मुख्य रस्त्यावर कारचा भीषण अपघात झाला. ही कार थेट एका दुकानावर आणि जिल्हा बँकेच्या एटीएम केंद्रावर धडकली. या धडकेत दुकानाचे व एटीएमचे मोठ्या प्रमाणात नुकसान झाले असून, रस्त्यालगत उभी असलेली एक वॅगनार कारही या अपघातात जोरदार धडकून नुकसानग्रस्त झाली आहे.या प्रकरणी कंटेनर चालक मनोज पाल यांनी दिलेल्या तक्रारीवरून पोलिसांनी सुजल सचिन पवार (रा. झाराप), राहुल अमित शिरसाट (रा. कुडाळ), प्रशांत नितीन सावंत व प्रज्वल नितीन सावंत (दोघे रा. वेताळ बांबर्डे), मंदार सोनू उमरकर (रा. कुडाळ) आणि राहुल सदानंद नलावडे (रा. पावशी)

यांच्याविरोधात दरोड्याचा गुन्हा दाखल केला आहे. हे सर्व आरोपी स्थानिक तरुण असल्याची माहिती पोलिसांकडून देण्यात आली आहे.

या संपूर्ण घटनेमुळे कुडाळ शहरासह परिसरात खळबळ उडाली असून, रात्रीच्या वेळी होणाऱ्या गुन्हेगारी प्रकारांबाबत नागरिकांमध्ये चिंता व्यक्त केली जात आहे. सहाय्यक पोलीस निरीक्षक जयदीप पाटील यांच्या मार्गदर्शनाखाली या प्रकरणाचा सखोल तपास सुरू असून, आरोपींच्या हालचाली, गुन्ह्यामागील उद्देश आणि यामागे आणखी कोणी सहभागी आहे का, याचा पोलिसांकडून शोध घेतला जात आहे.

कुडाळसारख्या शांत तालुक्यात घडलेल्या या बेधडक आणि धाडसी गुन्हेगारी प्रयत्नामुळे कायदा-सुव्यवस्थेचा प्रश्न पुन्हा एकदा ऐरणीवर आला आहे.