🛑मुख्यमंत्री देवेंद्र फडणवीस यांचा निवडणूक फॉर्म्युला स्पष्ट.;मुंबईत महायुती राज्याभरात स्वबळावर.

🖋️लोकसंवाद /- मुंबई.

राज्यातील स्थानिक स्वराज्य संस्थांच्या निवडणुकांचा राजकीय फॉर्म्युला अखेर मुख्यमंत्री देवेंद्र फडणवीस यांनी स्पष्ट केला आहे. “मुंबईत महायुती एकत्र, पण राज्यभर स्वबळावर लढाई!” अशी ठाम भूमिका त्यांनी जाहीर केली.

पत्रकारांशी झालेल्या अनौपचारिक संवादात फडणवीस म्हणाले की, मुंबई महानगर पालिकेच्या निवडणुकीत भाजप, शिंदे गट आणि अजित पवार गट हे तिन्ही पक्ष महायुती म्हणून एकत्र लढणार आहेत. मात्र, ठाणे, पुणे, पिंपरी-चिंचवडसह राज्यातील इतर ठिकाणी प्रत्येक पक्ष स्वबळावर निवडणुकीत उतरून नंतर महायुतीच्या रूपाने एकत्र येणार असल्याचे त्यांनी स्पष्ट केले.

दरम्यान, काँग्रेसने ठाकरे गटासोबत आघाडी नाकारत स्वतंत्र लढाईची घोषणा केली आहे. तर मनसे आणि शिवसेना उबाठा पक्षाच्या हालचालींमुळे ठाकरे बंधूंच्या संभाव्य युतीच्या चर्चांना ऊत आला आहे. अशा परिस्थितीत मुख्यमंत्री फडणवीस यांच्या या विधानामुळे राज्याच्या राजकारणात नव्या राजकीय समीकरणांची चर्चा रंगू लागली आहे.