🛑बेकायदा गुरे वाहतूक करणाऱ्या 3आयशर टेम्पो आणि 1 पिकअप टेम्पोवर बांदा पोलिसांची कारवाई.

🖋️लोकसंवाद /- बांदा.

फोंडा-गोवा येथून सांगलीच्या दिशेने गुरांची बेकायदा वाहतूक करणाऱ्या रॅकेटवर बांदा पोलिसांनी काल रात्री ११.३५ वाजण्याच्या सुमारास इन्सुली पोलीस चेकपोस्टवर मोठी कारवाई केली.

या कारवाईत तीन आयशर टेम्पो आणि एका पिकअप टेम्पोत कोंबण्यात आलेली तब्बल ४७ गुरे जप्त करण्यात आली. पोलिसांनी गुरांसह एकूण ५१ लाख रुपयांचा मुद्देमाल ताब्यात घेतला आहे.

प्राण्यांचा छळ प्रतिबंधक अधिनियम कायद्यानुसार या प्रकरणी ११ जणांवर गुन्हे दाखल करण्यात आले आहेत.

याबाबत अधिक माहिती अशी की, गुरांना गवत किंवा पाण्याची कोणतीही सोय न करता दाटीवाटीने टेम्पोत कोंबण्यात आले होते. ज्यामुळे गोरक्षक संतप्त झाले होते. या कारवाई दरम्यान बांदा पोलीस स्टेशनमध्ये मोठ्या संख्येने गोरक्षक दाखल झाले होते. यावेळी बांदा पोलीस निरीक्षक विकास बडवे, दोडामार्ग पोलीस निरीक्षक हेमचंद्र खोपडे, वेंगुर्ले पोलीस निरीक्षक निसर्ग ओतारी यांच्यासह मोठा पोलीस फौजफाटा तैनात होता. गुरांची अमानुषपणे वाहतूक करणाऱ्या सर्व संबंधितांवर कठोर कारवाई करण्याची मागणी गोरक्षकांनी केली.

यात रात्री उशिरा सुनील ज्ञानेश्वर पाटील (बेळगाव), अमोद फुशन शर्मा (बिहार), किरण भांगरे (फोंडा गोवा), बाबू इलाही जामदार (शिरोळ कोल्हापूर), सतीश बाबुराव पुजारी (शिरोळ कोल्हापूर), नामदेव पंढरीनाथ पाटील (कवठेमहाकाळ सांगली), सुलोचना महेश गिरोडकर (गोवा), पोपट जयवंतराव पाटील (कवठेमहाकाळ सांगली), प्रदीप हैबती सव्वासे (कोल्हापूर), सुरत शौकत लकडे (कोल्हापूर) आणि श्याम रामराव कुलकर्णी (सांगली) या अकरा जणांवर गुन्हे दाखल करण्यात आले आहेत. जप्त करण्यात आलेल्या सर्व ४७ गुरांना आज सकाळी त्यांच्या मूळ ठिकाण फोंडा-गोवा येथे परत सोडण्यात आले आहे.