🛑रेल्वे प्रवासात अज्ञात चोरट्याने मोबाईल चोरून प्रवश्याच्या बँक खात्यातून रक्कम केली लंपास.

🖋️लोकसंवाद /- रत्नागिरी.

दिवा ते सावंतवाडी पॅसेंजर रेल्वेने प्रवास करणाऱ्या प्रवाशाचा मोबाईल अज्ञात चोरट्याने चोरून,त्या मोबाईलचा वापर करत त्याच्या बँक खात्यातून तब्बल १६,९०० रुपयांची रक्कम लंपास केल्याची धक्कादायक घटना उघडकीस आली आहे.संगमेश्वर पोलिस ठाण्यात या प्रकरणी गुन्हा दाखल करण्यात आला आहे.

फिर्यादी संतोष सुभाष राणे (वय ४२, रा. सडुरे,गावठाणवाडी, ता.वैभववाडी,जि. सिंधुदुर्ग) हे २ मे रोजी दिवा–सावंतवाडी पॅसेंजर रेल्वेने प्रवास करत असताना संगमेश्वर रेल्वे स्थानकाच्या परिसरात त्यांच्या खिशातील मोबाईल चोरीस गेला.विशेष म्हणजे,चोरट्याने त्याच मोबाईलचा गैरवापर करून २२ एप्रिल ते २ मे या कालावधीत त्यांच्या स्टेट बँक ऑफ इंडिया,वैभववाडी शाखेतील खात्यातून १६,९०० रुपये ऑनलाईन पद्धतीने काढून घेतले.

या फसवणुकीनंतर संतोष राणे यांनी संगमेश्वर पोलिस ठाण्यात तक्रार दाखल केली असून पोलिसांनी अज्ञात चोरट्याविरोधात गुन्हा नोंदवून तपास सुरू केला आहे.