🛑कुडाळ,सावंतवाडी,वेंगुर्लेसह सिंधुदुर्गात ढगांच्या गडगडाटासह जोरदार पाऊस,शेतकरी व बागायतदार चिंतेत.

✍🏼लोकसंवाद /- सिंधुदूर्ग.

आज ढगांच्या गडगडाटासह सिंधुदुर्गात पाऊस कोसळला. परतीचा पाऊस लांबल्याने दिवाळीच्या तोंडावर गुलाबी थंडीची चाहूल लागली नाही तसेच शेतकरी व बागायतदार चिंतेत आहेत.

गेल्या काही दिवसांपासून संध्याकाळी विजांचा लखलखाट व ढगांच्या गडगडाटासह पाऊस कोसळत आहे. काळाकुट्ट अंधार करून पाऊस कोसळत असल्याने शेतकर्‍यांचे नुकसान होत आहे. दिवाळीच्या तोंडावर गुलाबी थंडीची चाहूल लागते. पण गेल्या काही वर्षांत पर्यावरणीय समतोल ढासळल्याने नैसर्गिक आपत्तीत वाढ झाली आहे. शेती व बागायती पिकांची नुकसानी होते.

सध्या भात पीक कापणी सुरू असून यंदा दिपावलीला पोहे बनविण्यासाठी भात बहुतेक ठिकाणी शेतकर्‍यांना मिळु शकले नाही. तसेच पाऊस लांबल्याने भात कापणीला उशीर झाला. त्यामुळे दुबार पेरणी करण्यात विलंब होणार आहे. दिवाळीच्या तोंडावर गुलाबी थंडीची चाहूल लागली की आंबा व काजू बागायतदार खुष असतात. गुलाबी थंडी आंबा व काजू पीकाला मोहर यायला पोषक वातावरण निर्माण करते असे जाणकारांचे मत आहे.