चेकचा अनादर केल्याप्रकरणी आरोपीस शिक्षा.;बँकेच्या वतीने अॅड. अमोल मालवणकर यांचा युक्तीवाद.

लोकसंवाद /- कुडाळ.

चेकचा अनादर केल्याप्रकरणी आरोपीस शिक्षा करण्यात आली आहे.कॅथॉलिक अर्बन को ऑपरेटिव्ह क्रेडीट सोसायटी लि.सावंतवाडी,शाखा कणकवली बँकेच्या वतीने अॅड. अमोल अशोक मालवणकर व अॅड. सुरेंद्र महादेव तेली यांनी कामकाज पाहिलेले आहे.

गाव मौजे कणकवली, बाजारपेठ, ता. कणकवली येथील गोपाळ सुधाकर मुसळे याने कॅथॉलिक अर्बन को ऑपरेटिव्ह क्रेडीट सोसायटी लि. सावंतवाडी, शाखा कणकवली यांचेकडून व्यवसायासाठी रक्कम रु. ५०,०००/- (रुपये पन्नास हजार मात्र) चे कर्ज घेतलेले होते. सदर कर्जाच्या रक्कमेची अंशतः परतफेड करण्याकरीता गोपाळ सुधाकर मुसळे यांने पतसंस्थेस ‘ बैंक ऑफ महाराष्ट्र, शाखा कणकवली’ चा चेक क्रमांक ०२२१६२ चा दिनांक २४/०७/२०१७ रोजीचा रक्कम रुपये २४,०००/- चा चेक दिलेला होता. परंतू आरोपी याचे खात्यामध्ये पुरशी रक्कम नसल्यामुळे सदरचा चेक Fund Insuffient च्या चेक रिटर्न मेमोसहित चेक परतीच्या टिपणीने दिनांक २५/०७/२०१७ रोजी परत आलेला होता. सदरचे चेक अनादरीत होवुन परत आलेला होता.

त्यामुळे फिर्यादी कॅथॉलिक अर्बन को ऑपरेटिव्ह क्रेडीट सोसायटी लि. सावंतवाडी, शाखा कणकवली यांनी आपले वकीलांमार्फत दिनांक १६/०८/२०१७ रोजी रजिस्टर्ड मागणी नोटीस पाठविली तरी देखील मुदतीत आरोपीने सदर चेकची रक्कम फिर्यादीकडे जमा केलेली नाही.

त्यामुळे गोपाळ सुधाकर मुसळे यांचेविरुध्द कॅथॉलिक अर्बन को ऑपरेटिव्ह क्रेडीट सोसायटी लि. सावंतवाडी, शाखा कणकवली यांनी कणकवली कोर्टात निगोशिएबल इन्स्ट्रुमेंट अॅक्ट चॅप्टर १७ चे कलम १३८ प्रमाणे फिर्याद दाखल केलेली होती. सदर केसच्या कामी फिर्यादी पतसंस्थेतर्फे मॅनेजर यांचा जबाब होवून गोपाळ सुधाकर मुसळे हा चेकची रक्कम कायदेशीररित्या फिर्यादी पतसंस्थेस देणे लागत असून त्याकरीता सदरचा चेक दिलेला होता.व तो अनादरीत झालेला होता व त्यामुळे निगोशिएबल इन्स्ट्रुमेंट अॅक्ट चॅप्टर १७ चे कलम १३८ प्रमाणे गुन्हा केलेला आहे, ही बाब फिर्यादी यांनी त्यांचे वकीलांमार्फत मे. कोर्टात शाबीत केलेली आहे. असा युक्तीवाद फिर्यादी पतसंस्थेचे वकील अॅड. अमोल अशोक मालवणकर यांनी केला फिर्यादी यांचे वकीलांचा युक्तीवाद ग्राहय मानून आरोपीस मे. कोर्टाने खालीलप्रमाणे शिक्षा केलेली आहे.

आदेश,१) आरोपीला फौजदारी प्रक्रिया संहितेचे कलम २५५ (२) नुसार, परक्राम्य दस्तऐवज कायदयाचे कलम १३८ अन्वये ठेवणेत आलेल्या आरोपात दोषी ठरवून सहा महिन्याचा साधा कारावास व रक्कम रुपये ३२,०००/- इतका दंड ठोठावण्यात येतो.२) फौजदारी प्रक्रीया संहिता कलम ३५७ प्रमाणे सदर दंडाची रक्कम नुकसान भरपाई म्हणून फिर्यादीला देण्यात यावी. आरोपीने तशी रक्कम ३० दिवसाच्या आत भरावी. तशी रक्कम न भरल्यास ६ महिन्याची साध्या कारावासाची शिक्षा भोगावयाची आहे.वरनमूद केल्याप्रमाणे कणकवली येथील मे. प्रथमवर्ग न्यायदंडाधिकारी श्री. टी.एच. शेख साहेब यांनी आदेश करुन आरोपी यास शिक्षा ठोठावलेली आहे.