🛑“भुलभुल्लैया “ या व्यावसायिक नाटकाचा शुभारंभाचा प्रयोग सांस्कृतिक व माहिती तंत्रज्ञान मंत्री आशिष शेलार यांच्या शुभहस्ते संपन्न..

✒️लोकसंवाद /- कुडाळ.

श्री लक्ष्मीनारायण प्रोडक्शन्स कुडाळ व रंगतसंगत निर्मित “भुलभुल्लैया “ या व्यावसायिक नाटकाचा शुभारंभाचा प्रयोग दिनांक १९ एप्रिल २०२६ रोजी अक्षय्यतृतीयेच्या शुभमुहूर्तावर रवींद्र नाट्य मंदिर, प्रभादेवी येथे महाराष्ट्र राज्याचे सांस्कृतिक व माहिती तंत्रज्ञान मंत्री आशिष शेलार यांच्या शुभहस्ते पार पडला. यावेळी सारस्वत बँकचे संचालक अनिल आंबेसकर, भारतीय जनता पार्टी जिल्हाध्यक्ष प्रभाकर सावंत, प्रदेश उपाध्यक्ष अतुल काळसेकर, डॉ.अनिल नेरूरकर, राष्ट्रवादीचे जिल्हाध्यक्ष अमित सामंत , व्याधच्या संपादिका संजीवनी देसाई, एडवोकेट संग्राम देसाई ,कमशिप्र मंडळाचे कार्याध्यक्ष शशिकांत गावडे, मनीष दाभोलकर, जयेंद्र साळगावकर, ज्येष्ठ दिग्दर्शक कुमार सोहोनी, डॉक्टर संजीव आकेरकर, वेशभूषाकार मंगल केंकरे, नाटकाचे निर्माते रणजीत देसाई व केदार सामंत, सूत्रधार विजय सूर्यवंशी उपस्थित होते. यानिमित्ताने श्री लक्ष्मीनारायण प्रोडक्शनच्या वतीने एडवोकेट आशिष शेलार यांचा सन्मानचिन्ह देऊन एडवोकेट संग्राम देसाई यांच्या हस्ते सत्कार करण्यात आला. या नाटकाचे दिग्दर्शक व ज्येष्ठ सीने व नाट्य दिग्दर्शक कुमार सोहोनी यांच्या 125 व्या कलाकृती बद्दल त्यांचा सांस्कृतिक मंत्री आशिष शेलार यांच्या हस्ते सत्कार करण्यात आला.

या भुलभुलय्या या नाटकामध्ये प्रमुख भूमिकेत ज्येष्ठ अभिनेत्री प्रिया लक्ष्मीकांत बेर्डे या दिसणार असून त्यांच्यासह साहिल देसाई, आरती सोळंकी, अमीर तडवळकर, परिणीता पावसकर, आशुतोष घोरपडे व विजय सूर्यवंशी हे कलाकार काम करीत आहेत. सिंधुदुर्गातील युवा संगीतकार विजय नारायण गवंडे यांनी या नाटकासाठी संगीत दिलेले असून मंगल केंकरे या वेशभूषाकार आहेत.एप्रिल अखेर हे नाटक कोकण दौऱ्यावर येत असून चिपळूण, कुडाळ, सावंतवाडी व वेंगुर्ला येथे या नाटकाचे प्रयोग होणार आहेत.