🛑कोकणातील सिंधुदुर्ग मधील सावरवाड येथील पहिल्या स्फटिक शिवलिंगाचे हजारो भाविकांनी घेतले दर्शन.

✒️लोकसंवाद /- सिंधुदुर्ग.

सिंधुदुर्ग जिल्ह्यातील सावरवाड येथील नूतन स्फटिक शिवलिंग मंदिरात महाशिवरात्रीचा उत्सव मोठ्या उत्साहात आणि भक्तिमय वातावरणात संपन्न झाला. कोकणातील अशा प्रकारचे हे पहिलेच स्फटिक शिवलिंग असल्याने यावर्षी दर्शनासाठी भाविकांचा महासागर लोटला होता.अध्यात्मिक उर्जा आणि शास्त्रीय संगीताच्या सुरावटींनी संपूर्ण सावरवाड परिसर शिवमय झाला होता.

या सोहळ्याचे मुख्य आकर्षण म्हणजे भारतातील सर्वात मोठ्या स्फटिक शिवलिंगांपैकी एक असलेले आणि ‘वायव्यमुखी’ स्थान असलेले हे दुर्मिळ शिवलिंग. ५० लाख मंत्रोच्चारांनी सिद्ध केलेल्या या शिवलिंगाच्या दर्शनासाठी पहाटेपासूनच लांबच लांब रांगा लागल्या होत्या. स्फटिकाच्या शुभ्र धवल तेजामुळे आणि मंदिरातील पवित्र वातावरणामुळे भाविकांना एक वेगळीच अनुभूती येत होती.

◼️रुद्रनाथ फाउंडेशनतर्फे सांस्कृतिक मेजवानी..

केवळ धार्मिक विधीच नव्हे, तर कलेच्या माध्यमातूनही शिवाची उपासना करण्यात आली. ‘रुद्रनाथ फाउंडेशन’ तर्फे महाशिवरात्रीनिमित्त शास्त्रीय संगीताच्या विशेष कार्यक्रमाचे आयोजन करण्यात आले होते. नामवंत कलाकारांच्या सुरावटींनी भाविकांना मंत्रमुग्ध केले. “शिवाच्या चरणी स्वरांजली अर्पण करणे, हा एक अलौकिक अनुभव होता,” अशा भावना उपस्थित श्रोत्यांनी व्यक्त केल्या. कोकणातील पहिले आणि भव्य स्फटिक शिवलिंग, मंत्रसिद्ध शिवलिंगाच्या दर्शनाने भाविकांमध्ये सकारात्मकतेचा संचार. वाढती गर्दी लक्षात घेता मंदिर प्रशासनाकडून चोख व्यवस्था करण्यात आली होती. सावरवाडमधील हे स्फटिक शिवलिंग आता केवळ धार्मिक केंद्र न राहता, कोकणातील एक प्रमुख पर्यटन आणि आध्यात्मिक केंद्र म्हणून नावारूपास येत आहे.त्यामुळे जिल्ह्यातील जिल्ह्याबाहेरील परदेशी पर्यटक यांचा या मंदिराकडे येण्याचा ओघ वाढला आहे.