🛑मालवण -कणकवलीत शिंदेसेनेचे वर्चस्व तर,निलेश राणे ठरले ‘किंग मेकर’ ‘होम पीच ‘वर नितेश राणेना धक्का.

◼️भाजपाने सावंतवाडी -वेंगुर्ला राखलं,विशाल परब ठरले किंगमेकर तर,केसरकरांच्या नेतृत्वावर प्रश्नचिन्ह.

🖋️लोकसंवाद /- समिल जळवी सिंधुदुर्ग.

सिंधुदुर्ग जिल्ह्यातील नगरपरिषद आणि नगरपंच्यायत च्या झालेल्या निवडणुकीत निकाल जाहिर झाल्यानंतर जिल्ह्यातील मालवण नगरपरिषद आणि कणकवली नगर पंचायतीवर शिंदेसेनेने आपले वर्चस्व प्रस्थापित केले असून आमदार निलेश राणे हे किंगमेकर ठरले आहेत.शहरविकास आघाडीच्या विजयाने जिल्ह्याचे पालकमंत्री नितेश राणे यांना त्यांच्या ‘होम पिच’वरच धक्का बसला आहे.सावंतवाडी आणि वेंगुर्ल्यात मात्र भाजपाने घवघवीत यश मिळवत आपले वर्चस्व निर्माण केल्याने शिंदेसेनेचे आमदार व माजी मंत्री दीपक केसरकरांच्या नेतृत्वावर प्रश्नचिन्ह निर्माण झाले आहे.तर भाजप चे युवा नेते श्री.विशाल परब हे किंगमेकर ठरले आहेत. या निवडणुकीत ठाकरे सेना तिसऱ्या स्थानावर गेली असून जोरदार फटका बसला आहे.

कुडाळ मालवण चे आमदार निलेश राणे यांच्या ‘स्टिंग ऑपरेशन’ मुळे देशभर गाजलेल्या मालवण नगर परिषदेवर शिंदे सेनेने भगवा फडकवत आपले वर्चस्व निर्माण केले.नगराध्यक्ष पदासाठी झालेल्या अत्यंत चुरशीच्या निवडणुकीत शिंदे सेनेच्या सौ.ममता वराडकर या तब्बल 1300 मतांनी विजयी झाल्याच शिवाय अन्य 10 जण नगरसेवकपदी निवडून आले.

भाजपाला 5 जागांवर समाधान मानावे लागले तर उबाठा सेनेला अवघ्या 4 जागा मिळून हा पक्ष तिसऱ्या स्थानावर फेकला गेला आहे.

कणकवली शहरातच नव्हे तर सिंधुदुर्ग जिल्ह्यातील चारही ठिकाणी भाजपाचाच झेंडा फडकणार असा दावा सिंधुदुर्ग जिल्ह्याचे पालकमंत्री नितेश राणे यांनी केला होता.मात्र आमदार निलेश राणे आणि माजी आमदार राजन तेली यांच्या नेतृत्वाखाली स्थापन झालेल्या शहर विकास आघाडीने अखेर कणकवली शहरावर आपले वर्चस्व निर्माण केले.

नगराध्यक्षपदी निवडून आलेले माजी नगराध्यक्ष संदेश पारकर हे सरळ लढतीत अवघ्या 145 मतांनी विजयी झाले.कणकवलीत शहर विकास आघाडीने चांगल्या जागा जिंकल्या.वेंगुर्ल्यात मात्र भाजपाने नगरपरिषद ताब्यात घेतली.या ठिकाणी माजी नगराध्यक्ष राजन गिरप हे पुन्हा एकदा नगराध्यक्षपदी 430 मतांनी विजयी झाले.

सावंतवाडी शहरावर शिंदे सेनेचे नेते माजी मंत्री व आमदार दीपक केसरकर यांचे वर्चस्व होते,मात्र या भाजप चे युवा नेते विशाल परब यांनी सावंतवाडी वेंगुर्ला या ठिकाणी मेहनत घेत सावंतवाडी वेंगुर्ला येथे भाजपचे नगराध्यक्ष निवडुन आलेत.यामध्ये विशाल परब हे किंगमेकर ठरले आहेत.त्यामुळे सावंतवाडी, वेंगुर्ला या ठिकाणी भाजपाने मुसंडी मारत आपले वर्चस्व निर्माण केले आहे.याचे श्रेय विशाल परब यांना जात आहे.

राजघराण्यातल्या श्रद्धाराणी सावंत -भोसले या भाजपाच्या नगराध्यक्ष पदाच्या उमेदवार या अत्यंत चुरशीच्या पंचरंगी लढतीत 1363 मतांनी विजयी झाल्या.आणि त्यांच्यासह भाजपाने 11 जागा जिंकल्या हे विशेष होय.या ठिकाणी शिंदे सेनेला 7 तर ठाकरे सेनेला 1 व काँग्रेसला 1 असे प्रत्येकी एक,जागा मिळाली आहे.

◼️नगराध्यक्षपद -मतदान
पक्ष निहाय उमेदवार – मिळालेली मते

◼️सावंतवाडी नगरपरिषद.-
1/श्रद्धाराणी सावंत-भोसले (भाजपा) -5788(विजयी)
2/ऍड. नीता सावंत कविटकर(शिंदे सेना) -4425
3/सीमा मठकर (उबाठा -सेना)-2184
4/साक्षी वंजारी(काँग्रेस) – 576
5/अन्नपूर्ण कोरगावकर (अपक्ष)
-336

◼️वेंगुर्ला नगरपरिषद
1/दिलीप गिरप(भाजपा) -2549
2/नागेश गावडे (शिंदे सेना)-2119
3./विलास गावडे(इंदिरा काँग्रेस)-1854.
4/संदेश निकम-(उबाठा सेना)-839
5/सोमनाथ टोमके (अपक्ष)-43
6/नंदन वेंगुर्लेकर(अपक्ष)-39

◼️मालवण नगरपरिषद
1/ममता वराडकर (शिंदे सेना)-4201(विजयी)
2/पुजा करलकर (उबाठा)-3179
3/शिल्पा खोत (भाजपा)-3154

◼️कणकवली नगरपंचायत.
1/संदेश पारकर (शहर विकास आघाडी)-5241
2/समीर नलावडे (भाजपा)–5096