🛑शिरोडा वेळागर दुर्घटनेतील दोघांचे मृतदेह आढळले.

🖋️लोकसंवाद /- वेंगुर्ला.

शिरोडा वेळागर समुद्रकिनारी दोन दिवसांपूर्वी झालेल्या दुर्घटनेतील 2 मृतदेह आज रविवारी केळूस निवती व वेंगुर्ले नवाबाग समुद्रकिनारी आढळून आले आहेत. वेंगुर्ले तालुक्यातील शिरोडा वेळागर येथे शुक्रवारी सायंकाळी कुडाळ, बेळगाव येथील पर्यटनासाठी आलेल्या परिवारातील सात इसम समुद्रात बुडाल्याची धक्कादायक घटना घडली होती.यातील तिघांचे मृत्यू झाले होते. तर एक तरुणी व एक इसम बचावले होती. अन्य चार जण समुद्रात बेपत्ता झाले होते.यापैकी दोघांचे मृतदेह शुक्रवारी रात्री व शनिवारी आढळून आले होते. तर उर्वरित दोघांचे मृतदेह आज रविवारी आढळून आले आहेत. यामधील इरफान मोहम्मद इसाक कित्तूर , (वर 36) रा. बेळगाव यांचा मृतदेह सकाळी 11 वाजता केळूस निवती येथील समुद्रात आढळून आला. तर जाकीर निसार मणियार, (वय १३) रा. पिंगुळी गुढीपूर त्याचे मृतदेह वेंगुर्ले नवाबाग येथील समुद्रामध्ये दुपारी 12 वाजता आढळून आला आहे. सदर शोध मोहीम साठी मत्स्य व बंदर विकास मंत्री नितेश राणे यांच्या आदेशानुसार मत्स्य विभागाचे ड्रोन वापरण्यात आले व महसूल प्रशासनाचे एचडीएम श्री. निकम व तहसीलदार ओंकार ओतारी यांचे मार्गदर्शन मिळाले. प्रशासनासह स्थानिक ग्रामस्थ, मच्छिमार आदीचे मोलाचे सहकार्य लाभले.सदरची शोध मोहीम पोलीस अधीक्षक मोहन दहिकर , अतिरिक्त पोलीस अधीक्षक नयोमी साटम , उपविभागीय पोलीस अधिकारी विनोद कांबळे यांच्या मार्गदर्शनाखाली यशस्वी झालेली आहे. याप्रकरणी वेंगुर्ले पोलीस स्थानकात आकस्मिक मृत्यू नोंद करण्यात आली आहे.निवती व वेंगुर्ले येथील मोहीम पोलीस निरीक्षक भीमसेन गायकवाड व निसर्ग ओतारी यांच्या मार्गदर्शनाखाली पोलिसांनी राबविली.