🛑हिर्लोक आंबेडकरनगर येथील वादग्रस्त घरास अंधश्रध्दा निर्मूलन समितीची भेट व जनजागृती,कुडाळ पोलिस ठाण्याचा पुढाकार.

✍🏼लोकसंवाद /- कुडाळ.

काही दिवसापूर्वी कुडाळ तालुक्यातील हिर्लोक आंबेडकरनगर येथे एका वादग्रस्त घरात अघोरी कृत्य व नरसंहार बळीसारखा प्रकार घडण्यापूर्वीच गावातील काही जागृत ग्रामस्थ व कुडाळ पोलिसांच्या दक्षतेमुळे वेळीच सदर प्रकार बंद पाडून संशयितांना अटक करण्यात आली आहे. या प्रकारामुळे गावात भितीचे वातावरण पसरले आहे.

अंधश्रध्दा निर्मूलन समितीच्या पदाधिकाऱ्यांकडून सदर घराची बाहेरून पाहणी करण्यात आली व गावातील काही ग्रामस्थांशी संवाद साधत जनजागृतीपर कार्यक्रम घेण्यात आला.यावेळी अंधश्रध्दा निर्मूलन समितीचे जिल्हाध्यक्ष ॲड. राजीव बिले, जिल्हा कार्याध्यक्ष श्री विजय चौकेकर, श्री अजित कानशिडे, ॲड संजय खानोलकर, ॲड मेघा परब, ॲड गौरी आपटे ,सामाजिकसेविका श्रीम.शांती भाटकर, श्री मारूती सोनवडेकर, श्री प्रफुल्ल जाधव व श्री कल्पेश जाधव, श्री सचिन मदने ,पत्रकार श्री बाळा राणे,कुडाळ पोलिस ठाण्याचे उपनिरीक्षक श्री रविंद्र शेडगे, आवळेगाव सब पोलिस ठाण्याचे मंगेश जाधव,हिर्लोक सरपंच सौ प्राची सावंत ,उपसरपंच श्री नरेंद्र राणे ,पोलिस पाटील श्री दिपक कदम आदी उपस्थित होते.

निसर्गरम्य हिर्लोक गावात असा काही प्रकार होणे हे अनपेक्षित आहे.या प्रकाराचे गावातील ग्रामस्थांनी तिव्र विरोध करत सदर अघोरी कृत्य व नरसंहारसारखा संशयास्पद प्रकार घडण्यापूर्वीच कुडाळ पोलिसांना जागृत ग्रामस्थांनी कळविल्यामुळेच पोलिसांनी तातडीने घटनास्थळी भेट घेत संशयित व्यक्तिंना ताब्यात घेत संपूर्ण घरच सीलबंद केले आहे. अंधश्रध्देचा एवढा गंभिर प्रकार ज्या भागात सुरू होता त्याची भनक आजूबाजूला कोणालाच नसल्याने सर्व परिसरात भितीचे वातावरण निर्माण झाले आहे.कुडाळ पोलिस व अंधश्रध्दा निर्मूलन समिती सिंधुदुर्ग व कुडाळ पदाधिकारी यांनी सदर भागातील ग्रामस्थांना जनजागृतीपर कार्यक्रम करत भिती दूर करण्याचा प्रयत्न केला.

*पोलिस उपनिरीक्षक रविंद्र शेडगे व मंगेश जाधव यांचा सत्कार*

या प्रकरणात कार्यतत्पर पणा दाखवणारे आवळेगाव सब पोलिस स्टेशन चे मंगेश जाधव व पोलिस उपनिरीक्षक रविंद्र शेडगे यांचा अखिल भारतीय अंधश्रध्दा निर्मूलन समिती सिंधुदुर्ग कडून विशेष सत्कार करण्यात आला.

*गावात जनजागृतीपर कार्यक्रम साठी ग्रामपंचायत पुढाकार घेणार- सरपंच सौ प्राची सावंत*

हिर्लोक गावात अंधश्रध्दा निर्मूलन जनजागृतीपर कार्यक्रम साठी ग्रामपंचायत पुढाकार घेणार असल्याचे सरपंच सौ प्राची सावंत यांनी सांगितले.