🛑महाविकास आघाडीची जवळपास 80 टक्के जागांवर चर्चा पूर्ण ? तिढा असलेल्या जागांबाबत वरिष्ठ नेत्यांच्या बैठकीत होणार निर्णय.

✍🏼लोकसंवाद /- मुंबई.

आगामी विधानसभा निवडणुकीच्या घोषणेआधी महाविकास आघाडीची जागावाटपाचा फॉर्म्युला निश्चित होण्याची शक्यता आहे. कारण जवळपास ८० टक्के जागांवर महाविकास आघाडीच्या नेत्यांमध्ये चर्चा झाल्याचे समजते आहे. महाविकास आघाडीच्या नेत्यांची जागावाटपासाठी गेल्या दोन दिवसांपासून चर्चा सुरु आहे. विशेष म्हणजे याआधीदेखील मविआ नेत्यांची जागावाटपासाठी चर्चा पार पडली आहे. पण दोन दिवसांपासून सुरु असलेल्या बैठका या जागावाटपाबाबत निर्णायक ठरण्याची शक्यता आहे. कारण या बैठकीत महाविकास आघाडीच्या नेत्यांमध्ये विधानसभेच्या अनेक जागांवर सहमती झाल्याची माहिती मिळत आहे.

महाविकास आघाडीची 288 जागांवर पहिल्या टप्प्याची चर्चा पूर्ण झाली आहे. तिढा असलेल्या जागांवर आता दुसऱ्या टप्प्यात चर्चा होईल. तिढा असलेल्या जागांबाबत वरिष्ठ नेत्यांच्या बैठकीत अंंतिम निर्णय घेतला जाईल. त्यासाठी तीनही पक्षांकडून एकत्र सर्व्हे केला जाईल. 30 ते 35 जागांमध्ये दोन ते तीन पक्ष आग्रही असल्याने यातल्या जागा दुसऱ्या टप्प्यात चर्चेसाठी घेतल्या जातील. काही जागांमध्ये अदलाबदल केला जाणार आहे. महाविकास आघाडी लवकरच नेत्यांचे दौरे आणि संयुक्त मेळाव्याबद्दल कार्यक्रम जाहीर करणार आहे.

विदर्भ सोडून महाराष्ट्रातील उर्वरित जागावाटपाची चर्चा पूर्ण झाली आहे, अशी माहिती मिळत आहे. महाविकास आघाडीच्या तीनही पक्षांची आतापर्यंत अनेक जागांवर सहमती झाल्याची माहिती समोर येत आहे. मविआ नेते तिढा असलेल्या जागांवर दुसऱ्या टप्प्यात चर्चा करणार, असे समजते. जागावाटपात 2019 च्या विधानसभा निवडणुकीत जो पक्ष ज्या जागा जिंकला, त्या जागा त्याच पक्षाला देण्याचा प्रयत्न आहे. जिंकलेल्या जागांमध्ये 10 ते 20 टक्के बदल केला जाणार आहे. मविआच्या जागावाटपाच्या पहिल्या बैठकीत मुंबई, कोकण, पश्चिम महाराष्ट्र, मराठवाड्यातील जागांवर चर्चा झाल्याची माहिती मिळत आहे. दरम्यान, तिढा असलेल्या जागांवर कोणत्या पक्षाची ताकद आहे हे जाणून घेतले जाणार आहे. त्यानुसार मेरीटवर निर्णय घेतला जाणार असल्याचे समजते.