🛑ज्येष्ठ बाल मानसोपचारतज्ज्ञ डॉ. प्रदीप पाटकर आणि चित्रलेखा पाटकर यांची बॅ.नाथ पै सेंट्रल स्कूल येथे 26,27 जानेवारीला कार्यशाळा..

✍🏼लोकसंवाद /- कुडाळ.

वाढत्या आधुनिकतेमुळे विद्यार्थ्यांमध्ये अस्थिरतेचे व अध्ययनातील अडथळ्यांचे प्रमाण वाढत चालले आहे. समवयस्क विद्यार्थ्यांच्या तुलनेत जेव्हा आपले मूल जास्त समस्याग्रस्त असते, त्यावेळी त्याच्यासोबत कसे वागावे, आपल्याला त्यास कशी मदत करता येईल हा प्रश्न पडतो. विद्यार्थी म्हणजे चंचलता आलीच. ही चंचलता प्रमाणाच्या बाहेर जाण्याआधी त्याला आवर घालणे गरजेचे असते. मुले चंचल असतील किंवा अभ्यासात मागे पडत असतील,अप्रगतशील असतील,एकाग्रता कमी असेल तर विद्यार्थ्यांच्या संपूर्ण व्यक्तिमत्त्वावर त्याचा प्रतिकूल परिणाम होत असतो. अशा वेळी त्यासाठी योग्य वेळी बाल मानसशास्त्राची मदत घेऊन योग्य मार्गदर्शन घेणे उपयुक्त ठरू शकते,नव्हे ती काळाची गरज असते. त्यासाठीच 42 वर्षांचा प्रदीर्घ अनुभव असलेले ज्येष्ठ मानसोपचार तज्ज्ञ तथा बालमानसशास्त्राचे अभ्यासक डॉ. प्रदीप पाटकर आपल्याशी संवाद साधू इच्छितात.

सोबत प्रख्यात मानसशास्त्रज्ञ/समुपदेशक चित्रलेखा पाटकर यांचा या कार्यशाळेत भरीव सहभाग असेल. त्यासाठी दिनांक 26 जानेवारी व 27 जानेवारी 2024 रोजी सकाळी १० ते ५ या वेळेत बॅ. नाथ पै सेंट्रल स्कूल येथे कार्यशाळेचे आयोजन करण्यात आले आहे.

दिनांक 26 जानेवारी रोजी सकाळी दहा ते साडेबारा वाजेपर्यंत काही बालवयीन विद्यार्थ्यांचे परीक्षण, समुपदेशन तसेच संध्याकाळी ३ ते ५पर्यंत विद्यार्थी व पालकांशी सुसंवाद आणि मार्गदर्शन, दिनांक 27 जानेवारी रोजी सकाळी इयत्ता दहावी व बारावीच्या विद्यार्थ्यांसाठी परीक्षा आणि ताण-तणावाचे व्यवस्थापन यावर मार्गदर्शनपर व्याख्यान; तसेच दुपारी ३ ते ५ या वेळेत शिक्षकांशी मुक्त संवाद रूपी चर्चासत्र आयोजित केले आहे तरी सदर कार्यशाळेत पालक व विद्यार्थी यांनी उपस्थित रहावे, असे आवाहन बॅ. नाथ पै शिक्षण संस्थेच्या वतीने करण्यात आले आहे.