🛑अंगणात गाडी लावल्याच्या रागातून झालेल्या वादात बेदम मारहाण, ऐकाचा झाला मृत्यू.;चौघांवर खूनाचा गुन्हा दाखल…

✍🏼लोकसंवाद /- वेंगुर्ला.

अंगणात गाडी लावल्याच्या रागातून झालेल्या वादात बेदम मारहाण करण्यात आल्याने गंभीर जखमी झालेल्या सोन्सुरे-आरवली येथील नारायण महादेव कावले (वय ५०) यांचा उपचारादरम्यान मृत्यू झाला. ही घटना आज पहाटे तीनच्या सुमारास घडली. दरम्यान याप्रकरणी त्यांचा मुलगा वैभव याने दिलेल्या तक्रारीनुसार सख्या काकासह पुतणा व दोन महिला असे मिळून चौघांवर खूनाचा गुन्हा दाखल करण्यात आला आहे. तसेच त्यांना तात्काळ आटक करण्यात आली आहे.अशी माहिती वेंगुर्ले पोलिस ठाण्याचे निरिक्षक अतुल जाधव यांनी दिली.

याबाबत अधिक माहिती अशी की, अंगणात गाडी लावल्याच्या रागातून नारायण कावले व त्यांचा मुलगा वैभव यांना त्याच्या काका-काकी व पुतण्याकडून बेदम मारहाण करण्यात आली होती. हा गुन्हा १७ तारखेला सोन्सुरे येथे घडला होता. यात श्री. कावले यांना गंभीर दुखापत झाल्याने त्यांना अधिक उपचारासाठी गोवा-बांबुळी येथे हलविण्यात आले होते. परंतु त्या ठिकाणी त्यांच्यावर उपचार करुन पुन्हा घरी सोडण्यात आले. त्यानंतरही त्यांना त्रास होत असल्यामुळे पुन्हा बांबूळी येथे दाखल करण्यात आले. मात्र उपचार सुरू असतानाच त्यांची आज पहाटे प्राणज्योत मालवली. दरम्यान बेदम मारहाण झाल्याने त्यांच्या आतडे व गुप्तांगाला गंभीर इजा झाल्यामुळे त्यांचा मृत्यू झाला, असा अंदाज तेथील वैद्यकिय अधिकाऱ्यांनी व्यक्त केला आहे. दरम्यान या प्रकरणी त्यांच्या काका, पुतण्यासह अन्य दोन महिला अश्या चौघांवर गुन्हा दाखल करुन त्यांना अटक करण्यात आली आहे.

यातील दोन्ही गटाचा जमिन जागेच्या कारणावरुन गेली अनेक वर्षे वाद होता. यातून त्यांच्यात नेहमी खटके उडत असत. परंतु १७ तारखेला अंगणात गाडी लावल्याच्या रागातून त्यांचा मुलगा वैभव याला गाडीत रोखून मारहाण करण्यात आली. त्याने आरडाओरड केल्यानंतर त्याला सोडविण्यासाठी वडील नारायण धावले. यावेळी त्यांनाही हाताच्या ठोश्याने आणि लाथा-बुक्क्यांनी मारहाण करण्यात आली. यात गंभीर दुखापत झाल्याने त्यांचा मृत्यू झाला, असा प्राथमिक अहवाल मिळाल्यानंतर चौघांवर खूनाचा गुन्हा दाखल करण्यात आला आहे. दरम्यान आज सायंकाळी उशिरा मृत नारायण यांचा मृतदेह नातेवाईकांच्या ताब्यात देण्यात आला. उशिरा त्यांच्यावर अंत्यसंस्कार करण्यात येणार आहे. त्यांच्या पश्चात पत्नी, मुलगा असा परिवार आहे. श्री. कावले हे परिसरात सुतारकाम करीत होते.