🛑सिंधुदुर्गातील विद्यार्थ्यांना संत राऊळ महाराज महाविद्यालयात उच्च शिक्षणाची संधी.;यूजीसीचा स्वायत्त दर्जा प्राप्त.

✒️लोकसंवाद /- कुडाळ.

कुडाळ येथील संत राऊळ महाराज कला, वाणिज्य व विज्ञान महाविद्यालयाला विद्यापीठ अनुदान आयोगाकडून यूजीसी स्वायत्त महाविद्यालयाचा दर्जा घोषित करण्यात आला आहे.महाविद्यालयाच्या शैक्षणिक वाटचालीतील हा महत्त्वपूर्ण टप्पा असून, यामुळे सिंधुदुर्ग जिल्ह्यातील विद्यार्थ्यांना कौशल्याधारित, व्यवसायाभिमुख आणि रोजगाराभिमुख शिक्षणाच्या अधिक संधी उपलब्ध होणार आहेत.महाविद्यालयात आयोजित पत्रकार परिषदेत ही माहिती देण्यात आली.

ऐशीच्या दशकाच्या सुरवातीला कुडाळ मधे फक्त उच्च माध्यमिक शिक्षणा पर्यंतचीच सोय होती. त्यावेळेस इयत्ता बारावी नंतर मुलांना सावंतवाडी किंवा वेंगुर्ला येथे महाविद्यालयीन शिक्षणासाठी जावं लागत असे. कुडाळ आणि कुडाळ तालुक्यातील मुलांची ही गैरसोय ओळखून सिंधुदुर्ग जिल्ह्यातील शिक्षण क्षेत्रातील नामांकित संस्था कराची महाराष्ट्रीय शिक्षण प्रसारक मंडळाने कुडाळ येथे महाविद्यालय सुरु करण्याचा निर्णय घेतला आणि दि. २५ जुन १९८४ रोजी कुडाळ मधे, कुडाळ तालुक्यातील पिंगुळी गावातील संत, परमपूज्य राऊळ महाराज यांच्या नावे परमपूज्य राऊळ महाराज कला व वाणिज्य महाविद्यालय सुरु झाले. याच महाविद्यालयाचे पुढे “संत राऊळ महाराज महाविद्यालय” असे नामकरण करण्यात आले. कुडाळ मधे कला व वाणिज्य शाखेतील मुलांसाठी एक दर्जेदार शिक्षणाची सोय उपलब्ध झाली, परंतु विज्ञान शाखेतील मुलांना अजुनही सावंतवाडी किंवा वेंगुर्ल्यातील महाविद्यालयात जावे लागत असे त्यामुळेच संस्थेने सन १९९६ पासून महाविद्यालयात विज्ञान शाखाही सुरु केली. त्यानंतर या पारंपरिक शिक्षणाबरोबरच मुलांना इथेच व्यावसायिक शिक्षणाची संधी उपलब्ध व्हावी या हेतूने संस्थेने सन २००२ पासून संत राऊळ महाराज महाविद्यालयात व्यावसायिक अभ्यासक्रम सुरु केले. आता या महाविद्यालयाच्या माध्यमातून कुडाळ मधे कला, वाणिज्य, विज्ञान याबरोबरच संगणक शास्त्र, माहीती व तंत्रज्ञान, व्यवस्थापन अभ्यासक्रम, अकाउंटींग व फायनान्स यासारख्या अभ्यासक्रमाचे पदवी शिक्षण मिळू लागले. याबरोबरच महाविद्यालयात रसायन शास्त्र, गणित, प्राणिशास्त्र, संगणक शास्त्र व अर्थशास्त्र या विषयातील पदव्युत्तर शिक्षणाचीही सोय संस्थेने उपलब्ध करून दिली. महाविद्यालयातील उच्चविद्याविभूषित प्राध्यापक वर्ग, शिस्तबद्ध वातावरण, आधुनिक सोयी सुविधांनी युक्त असे सुसज्ज वर्गखोल्या, सुसज्ज प्रयोगशाळा यामुळेच संत राऊळ महाराज महाविद्यालय हे सिंधुदुर्ग जिल्ह्यातील एक अग्रगण्य व नामांकित महाविद्यालय म्हणून ओळखले जाते. सन २०१० साली महाविद्यालयाला मुंबई विद्यापीठाचा सर्वोत्कृष्ट महाविद्यालय पुरस्कारही प्राप्त झालेला आहे. शैक्षणिक सुविधांबरोबरच महाविद्यालय क्रिडा व सांस्कृतिक, एन.एस.एस., एन.सी.सी. या क्षेत्रातही अग्रेसर आहे. महाराष्ट्र राज्य नाट्य स्पर्धेत सहभागी होणारे संत राऊळ महाराज महाविद्यालय हे एकमेव महाविद्यालय आहे. महाविद्यालयातील अनेक प्राध्यापक आज पी.एच.डी. साठी मार्गदर्शक म्हणून कार्यरत आहेत.

महाविद्यालयाची ही सर्व यशस्वी घोडदौड सुरु असतानाच महाविद्यालयाच्या शिरपेचात आणखी एक मानाचा तुरा खोवला गेला आहे, तो म्हणजे संत राऊळ महाराज महाविद्यालय आता स्वायत्त महाविद्यालय म्हणून विद्यापीठ अनुदान आयोगाकडून घोषित करण्यात आले आहे. स्वायत्त महाविद्यालय म्हणजे विद्यापीठाशी संलग्नता कायम ठेवून, विद्यापीठ अनुदान आयोगाच्या नियमांनुसार शैक्षणिक अभ्यासक्रम, अध्यापन पद्धती, परीक्षा आणि मूल्यमापन यांबाबत आवश्यक शैक्षणिक स्वातंत्र्य प्राप्त झालेले महाविद्यालय. स्वायत्ततेमुळे महाविद्यालयाला स्थानिक गरजा, विद्यार्थ्यांच्या क्षमता आणि रोजगाराच्या संधी लक्षात घेऊन अधिक लवचिक, कौशल्याधारित व रोजगाराभिमुख शिक्षण देता येते. सिंधुदुर्गसारख्या जिल्ह्यात स्वायत्त महाविद्यालयाची भूमिका केवळ पदवी शिक्षणापुरती मर्यादित राहत नाही. स्थानिक उद्योग, पर्यटन, मत्स्यव्यवसाय, कृषी, पर्यावरण संवर्धन, डिजिटल तंत्रज्ञान आणि ग्रामीण उद्योजकता यांच्याशी संबंधित अभ्यासक्रम व संशोधन विकसित करून महाविद्यालय जिल्ह्याच्या सामाजिक आणि आर्थिक विकासात महत्त्वाचे योगदान देऊ शकते. स्वायत्तता ही केवळ प्रशासकीय मान्यता नसून, शैक्षणिक गुणवत्ता, संशोधन, नवोपक्रम आणि विद्यार्थ्यांच्या सर्वांगीण विकासासाठी मिळालेली जबाबदारी आणि संधी आहे.

हे महाविद्यालय स्वायत्त होण्यासाठी संस्थेचे सहकार्यवाह श्री. महेंद्र गवस यांचे योगदान अतिशय महत्त्वपूर्ण आहे. याबरोबरच महाविद्यालयाच्या प्राचार्या सौ. स्मिता सुरवसे यांनीही विशेष प्रयत्न केलेले आहेत. या स्वायत्त महाविद्यालयाच्या माध्यमातून सिंधुदुर्ग जिल्ह्यातील विद्यार्थ्यांना अधिकाधिक व्यवसायाभिमुख शिक्षण मिळावे आणि नवीन पिढी अधिकाधिक सक्षम कशी करता येईल यावर संस्थेचा भर असणार आहे. विद्यार्थ्यांनी या संधीचा पुरेपूर लाभ घेऊन आपले भवितव्य उज्ज्वल करावे असे आवाहन मंडळाचे कार्याध्यक्ष श्री. शशिकांत गावडे यांनी केले आहे.