🛑वैभव नाईक यांनी स्वकर्तृत्वाचे दाखले द्यावेत, आमच्या तुकड्यावर बोलू नये.; निलेश राणे समर्थकांचा जोरदार पलटवार..

✒️लोकसंवाद /- कुडाळ.

उबाठा गटाचे आमदार वैभव नाईक यांनी सोशल मीडियाच्या माध्यमातून घोडगे येथील घटनेवरून केलेल्या टीकेला आता निलेश राणे समर्थकांनी चोख प्रत्युत्तर दिले आहे. कुडाळ एमआयडीसी येथील विश्रामगृह येथे आयोजित पत्रकार परिषदेत राणे समर्थकांनी नाईक यांच्यावर जोरदार टीकास्त्र सोडले. “आमचे नेते निलेश राणे जे बोलतात किंवा कृती करतात, ती पूर्ण विचारांती असते. वैभव नाईक यांनी आम्ही फेकलेल्या तुकड्यांवर बोलण्यापेक्षा स्वतःच्या दहा वर्षांच्या कार्यकाळातील कर्तृत्वाचे दाखले जनतेला द्यावेत,” अशा शब्दांत नाईक यांचा समाचार घेण्यात आला.

यावेळी बोलताना दादा साईल यांनी म्हटले की, गेल्या दहा वर्षांत नाईक यांनी आपल्या मतदारसंघात कोणतेही ठोस विकासकाम केले नाही. आमदार असताना ज्यांना विधानभवनातील सुरक्षा रक्षक देखील ओळखत नव्हते, त्यांना आता स्वतःची पुसलेली ओळख मिळवण्यासाठी इतर पक्षांच्या कामात नाक खुपसावे लागत आहे. जनतेने दिलेल्या संधीचा वापर त्यांनी केवळ स्वतःचे खिसे भरण्यासाठी आणि आपल्या मर्जीतील कंत्राटदारांना कामे देण्यासाठी केल्याचा गंभीर आरोपही करण्यात आला.
“बाबा भालचंद्र डेव्हलपर्स या नावाने बोगस कंपनी उभी करून अनधिकृत बांधकामे कोणी केली, हे वैभव नाईकांनी जनतेला सांगावे. उगाच आम्हाला तोंड उघडायला लावू नये,” असा इशाराही देण्यात आला. सत्तेत असताना आणि नसताना केवळ प्रसिद्धीसाठी ‘दहशतवाद’ म्हणून ओरड करणे ही नाईक यांची जुनी सवय असल्याचा टोलाही यावेळी लगावण्यात आला.
वैभव नाईक हे सातत्याने हिंदू विरोधी विचारांच्या लोकांची पाठराखण करत असल्याचे या निवेदनात म्हटले आहे. कुडाळ नगरपंचायतीमध्ये स्वतःच्या पक्षाकडे संख्याबळ असतानाही काँग्रेसच्या हिंदू विरोधी विचारधारा असलेल्या नगरसेवकांना नगराध्यक्षपद देऊन नाईक यांनी बाळासाहेबांच्या विचारांना हरताळ फासल्याची आठवण करून देण्यात आली.

म्हातु मानेकर यांच्या मुद्द्यावरूनही नाईक यांना घेरण्यात आले. “मानेकर चार वेळा जिल्हा परिषद सदस्य आणि उपाध्यक्ष होते, तरीही आंब्रड संघ मागासलेला का राहिला?” असा सवाल उपस्थित करत, गेल्या तीन वर्षांत निलेश राणे यांनी या भागाची जबाबदारी घेतल्यानंतरच येथील विकासकामे मार्गी लागल्याचा दावा समर्थकांनी केला.
यांची होती उपस्थिती
या पत्रकार परिषदेला जिल्हा परिषद उपाध्यक्ष दादा साईल, जि. प. सदस्य दीपलक्ष्मी पडते, जि. प. सदस्य दीपक नारकर, जि. प. सदस्य रुपेश कानडे, काका कुडाळकर, विनायक राणे आदी पदाधिकारी व कार्यकर्ते उपस्थित होते. येणाऱ्या काळात जनतेला या सर्व प्रश्नांची उत्तरे द्यावी लागतील, असेही शेवटी नमूद करण्यात आले.