🛑दागिने चोरी प्रकरणी अजुन एकाच्या मुसक्या एलसीबी पोलिसांनी आवळल्या.;दुपारनंतर आरोपीस न्यायालयात हजर करणार.

🖋️लोकसंवाद /- कणकवली.

फोंडाघाट येथे घरात घुसून दोन महिलांच्या अंगावरील दागिने चोरण्याचा प्रयत्न फसल्यानंतर पसार झालेल्या टोळीतील आणखी एका आरोपीला एलसीबीच्या पथकाने मंगळवारी रात्री सांताकूज-मुंबई येथे अटक केली. विल्सन जॉन पिंटो (५६, रा. सांताकुज) असे संशयित चोरट्याचे नाव आहे. त्याला बुधवारी सकाळच्या सुमारास कणकवली पोलिसांच्या स्वाधीन करण्यात आले आहे. त्याला बुधवारी दुपारनंतर न्यायालयात हजर करण्यात येणार असल्याची माहिती पोलिसांनी दिली आहे.

ही घटना फोंडा गाडी येथे ३० नोव्हेंबरला सकाळी ७वाजण्याच्या सुमारास घडली होती. तृप्ती लिंग्रस व त्यांची आई या दोघी घरी होत्या तर तृप्ती यांचे भाऊ मॉर्निंग वॉकला गेले होते. त्याचवेळी वरील तीन इसम जबरदस्तीने त्यांच्या घरात घुसले. त्यांनी तृप्ती व तिच्या आईच्या अंगावरील दागिने पळवण्याचा प्रयत्न केला. मात्र, दोघींनीही आरडाओरड केल्यानंतर तिन्ही चोरटे आपल्या हातातील साहित्य तिथेच टाकून पसार झाले होते. याबाबत तृप्ती यांच्या फिर्यादीनुसार घटनेची कणकवली पोलीस ठाण्यात नोंद करण्यात आली होती.

याप्रकरणी स्थानिक गुन्हा अन्वेषण शाखेच्या पथकाने चारच दिवसांपूर्वी जगदीश श्रीराम यादव (२५, भिवंडी), चनाप्पा साईबाणा कांबळे (50, ठाणे), नागेश हनुमंत माने (41, नेरूळ) अशा तिघांना मुबई परिसरातून अटक केली होती. आता चौथा आरोपीही अटकेत आला आहे. कारवाईमध्ये एलसीबीचे पोलीस उपनिरीक्षक अनिल हाडळ, हवालदार राजू जामसंडेकर, आशिष गंगावणे, किरण देसाई, ज्ञानेश्वर तवटे आदी सहभागी झाले होते.