🛑विज्ञान हेच प्रगतीचे गमक’: कोनाळकट्ट्यात ५३ व्या तालुकास्तरीय विज्ञान प्रदर्शनाला उत्स्फूर्त प्रतिसाद!

🖋️लोकसंवाद /- ​दोडामार्ग.

शिक्षण विभागाच्या वतीने व ​तिलारी खोरे शिक्षण प्रसारक मंडळ, कोनाळकट्टा यांच्या संयुक्त विद्यमाने आयोजित ५३ वे तालुकास्तरीय विज्ञान प्रदर्शन नुकतेच कोनाळकट्टा येथे उत्साहात पार पडले. या प्रदर्शनाच्या माध्यमातून विद्यार्थ्यांमध्ये वैज्ञानिक दृष्टिकोन रुजवून त्यांना नवनिर्मितीसाठी प्रेरित करण्याचा महत्त्वपूर्ण संदेश देण्यात आला.
​
​या कार्यक्रमाचे उद्घाटन संस्थेचे उपाध्यक्ष श्री. शैलेश सुरेश दळवी यांच्या हस्ते झाले. अध्यक्षीय भाषणात श्री. दळवी यांनी विज्ञानाचे महत्त्व अधोरेखित करताना, “विज्ञान हेच प्रगतीचे गमक आहे” असे स्पष्ट केले.

​श्री. दळवी म्हणाले, “जगात ज्या राष्ट्रांनी विज्ञानात प्रगती केली आहे, तीच राष्ट्रे प्रगतीपथावर आहेत. चीन आणि अमेरिका हे देश याचे उत्तम उदाहरण आहेत.” त्यांनी केवळ भारतासाठीच नव्हे, तर जगातील प्रगतीचा आधार विज्ञानातच दडला असल्याचे सांगितले.

​डॉ. कलाम आणि डॉ. साराभाई यांचा आदर्श घेण्याचे आवाहन
​श्री. दळवी यांनी यावेळी विद्यार्थ्यांना भारतरत्न डॉ. विक्रम साराभाई आणि डॉ. ए.पी.जे. अब्दुल कलाम यांचा आदर्श ठेवून स्वतःला विज्ञानाच्या क्षेत्रात झोकून देण्याचे आवाहन केले. या विज्ञान प्रदर्शनातूनच उद्याचे वैज्ञानिक तयार होतील, असा विश्वासही त्यांनी व्यक्त केला.

​यावेळी गटशिक्षणाधिकारी श्री. नासिर नदाफ यांनी मार्गदर्शन करताना, “विज्ञान हा जीवनातील एक महत्त्वाचा घटक आहे,” असे सांगत विज्ञान शिक्षकांनी विद्यार्थ्यांमध्ये या विषयाची आवड निर्माण केल्याचे श्रेय दिले.
​
​या प्रदर्शनाला संस्थेचे उपाध्यक्ष श्री. शैलेश सुरेश दळवी, सचिव श्रीम. स्वाती नाईक, संचालक श्री. विलास नाईक, श्री. सुधाकर बांदेकर, सरपंच कोनाळ श्रीम. अस्मिता अनिल गवस, गटसमन्वयक श्री. सूर्यकांत नाईक, उपसरपंच कोनाळ श्री. रत्नकांत कर्पे, गटशिक्षणाधिकारी श्री. नदाफ, मुख्याध्यापक श्री. विश्वनाथ सावंत, केंद्रप्रमुख श्री. सुधीर जोशी, श्रीम. अंजली जोशी आणि दोडामार्ग तालुका पत्रकार संघ अध्यक्ष श्री. रत्नदीप गवस यांच्यासह अनेक पदाधिकारी व संघटनांचे प्रतिनिधी उपस्थित होते.​कार्यक्रमाच्या यशस्वी आयोजनामुळे कोनाळकट्टा परिसरात वैज्ञानिक विचारांना आणि संशोधक वृत्तीला मोठी चालना मिळाली. गटविकास अधिकारी श्री. अजिंक्य सावंत यांनीही प्रदर्शनाला भेट देऊन विद्यार्थ्यांच्या उपक्रमांचे कौतुक केले.