🛑वकील श्रीनिवास गवस यांना न्यायालयाच्या आवारात धमकी.;वकील संघटनेची पोलीस निरीक्षकांकडे मागणी.

🖋️लोकसंवाद /- सावंतवाडी.

सावंतवाडी येथील वकील श्रीनिवास गवस यांना पक्षकाराकडून न्यायालयाच्या आवारातच धमकी देण्यात आली आहे. याबाबत सावंतवाडी पोलीस ठाण्यात अदखलपात्र गुन्हा दाखल करण्यात आला आहे. दरम्यान असे प्रकार राज्यात रोज घडत आहेत. त्यामुळे याची गंभीर दखल घेऊन याप्रकरणी न्यायालयाची विशेष परवानगी घेऊन धमकी देणाऱ्या संबंधितांच्या विरोधात कायद्यातील तरतुदीचा वापर करून न्यायालयाकडे त्या गुन्ह्याचा तपास करण्याची परवानगी मागण्यात यावी, अशी मागणी वकील संघटनेच्या वतीने आज सावंतवाडी पोलीस निरीक्षक अमोल चव्हाण यांच्याकडे करण्यात आली आहे.

याबाबतचे निवेदन वकील संघटनेच्या माध्यमातून देण्यात आले आहे. त्यात असे म्हटले आहे की, रॉनी जॉन डान्टस नावाच्या व्यक्तीने वकील श्री. गवस यांना न्यायालयांच्या आवारात धमकी दिली, असे त्यांचे म्हणणे आहे. याबाबत सावंतवाडी पोलीस ठाण्यात अदखलपात्र गुन्हा दाखल करण्यात आला. मात्र संबंधितावर न्यायाधीन तरतुदी नुसार कडक कारवाई करण्यात यावी, अशी मागणी वकील संघटनेच्या माध्यमातून करण्यात आली आहे. यावेळी संघटनेचे अध्यक्ष बालाजी रणशुर, ज्येष्ठ वकील दिलीप नार्वेकर आदी उपस्थित होते.