🛑सरन्यायाधीशांवर भ्याड हल्ला करणाऱ्या वकिलाची सनद रद्द करा..

🖋️लोकसंवाद /- वेंगुर्ला.

देशाच्या न्यायव्यवस्थेचा अत्यंत महत्त्वाचा घटक असलेल्या सरन्यायाधीशांवर मनासारखा निवाडा झाला नाही म्हणून मनुवादी विचारणीच्या एका वकिलाकडून बुट फेकण्याचा अत्यंत संतापजनक प्रकार घडला आहे. देशात मनुवाद आणू पाहणाऱ्या विचारसरणीकडून देशाच्या संविधानावर केला गेलेला हा एक भ्याड हल्ला आहे. असंविधानीक कृत्य करून नंतर याच कृत्याचे समर्थन करणाऱ्या संबंधित वकिलाने केलेल्या या निंदनीय कृतीचा आम्ही तीव्र शब्दात निषेध करत आहोत. या वकिलाची सनद रद्द करून त्याला कठोरातले कठोर शासन करावे, अशी मागणी फुले-शाहू-आंबेडकर विचारमंचातर्फे पंतप्रधान नरेंद्र मोदी यांच्याकडे केली आहे. याबाबतचे निवेदन त्यांनी वैगुल्यांचे तहसीलदार ओंकार ओतारी व पोलीस निरीक्षकांकडे  सुपुर्द केले.

संपूर्ण भारत देशात तीव्र पडसाद उमटविणारी ही अत्यंत निंदनीय घटना आहे. आपल्या देशाचे सरन्यायाधीश हे घटनात्मकदृष्ट्या अत्यंत महत्वाचे पद आहे. सदर वकिलाने केलेले हे कृत्य समस्त वकिली व्यवसायाला कलंक लावण्याचाच प्रकार आहे. कोणत्याही न्यायालयाचा न्यायाधीश असो, मनासारखा निवाडा झाला नाही म्हणून संबंधित न्यायाधीशावर हल्ला करणे म्हणजे भारतीय न्यायव्यवस्थेचा गळा दाबण्याचा प्रकार आहे. आपल्या देशाचे सरन्यायाधीश हे अत्यंत संवेदनशील व संविधानाचे उपासक असलेले न्यायाधीश आहेत. सरन्यायाधीश पदाची सूत्रे हाती घेतल्यापासून त्यांनी देशहिताचे व संविधानाचे रक्षण होईल असेच निर्णय घेतले आहेत. कोल्हापूर खंडपीठाचा निर्णय मार्गी लागवण्यातही त्यांची भूमिका महत्त्वाची आहे. अशा निःपक्षपाती सरन्यायाधीशांवर हल्ला करून न्यायव्यवस्थेला धाकात ठेवू पाहणाऱ्या वृतींचा समूळ नाश व्हायला हवा.

सदर घटनेनंतर सदर वकिलाचे निलंबन झाले आहे ही बाब आश्वासक वाटत असली तरी भारतीय न्याय व्यवस्थेवर हल्ला करणाऱ्या या वकिलाची सनद कायमस्वरूपी रह होणे गरजेचे आहे. संबंधित वकिलावर कायदेशीर कारवाई होणेही गरजेचे आहे. देशाचे पंतप्रधान या नात्याने या घटनेची गंभीर नोंद घेऊन संबंधित वकिलाला कठोरातले कठोर शासन करावे, अशी विनंती फुले शाहू आंबेडकर विचारमंचतर्फे अध्यक्ष जयप्रकाश चमणकर यांनी यावेळी केली. निवेदनाचे वाचन माजी नगरसेवक आत्माराम उर्फ दादा सोकटे यांनी केले.यावेळी फुले-शाहू-आंबेडकर विचारमंचचे उपाध्यक्ष प्रा. डॉ. सुनील भिसे, सचिव महेंद्र मातोंडकर, खजिनदार प्रदीप सावंत, प्रा. अरविंद बिराजदार, प्रा. वसंत नंदगिरीकर, अशोक सावळे, प्रा. श्रावण राठोड, महादेव करंगळे, ठाकरे सेनेचे तालुकाप्रमुख यशवंत उर्फ बाळू परब, वीज ग्राहक संघटनेचे तालुकाध्यक्ष संजय गावडे, माजी सभापती अभिषेक चमणकर, आंबा बागायतदार मुरलीधर पेडणेकर, एश्वर्य चमणकर, स्वप्निल शिरोडकर, हेमंत खडें, गोरक्ष डुंबरे, लाडू जाधव आदी यावेळी उपस्थित होते.उपस्थित सर्वांनी डाव्या हाताच्या दंडावर काळ्या फिती बांधून या निंदनीय घटेनचा तीव्र शब्दात निषेध व्यक्त केला. तहसीलदार ओंकार ओतारी यांनी सदर निवेदनाच्या प्रति जिल्हाधिकारी कार्यालयामार्फत पंतप्रधानाच्या कार्यालयात पाठविण्यात येईल, असे आश्वासन उपस्थितांना दिले. त्यानंतर वेंगुर्ले पोलीस स्टेशनवर सदर निवेदनाची प्रत पोलीस निरीक्षक उपस्थित नसत्याने ठाणे अमंलदारांना सुपुर्द करण्यात आले.