🛑कामगारांचे हक्क महत्त्वाचे, पण नागरिकांना वेठीस धरणे योग्य नाही.;संजू परब.

🖋️लोकसंवाद /- सावंतवाडी.

माजी नगराध्यक्ष संजू परब यांनी सावंतवाडीतील सफाई कामगारांच्या काम बंद आंदोलनावर आपली भूमिका स्पष्ट केली आहे. कामगारांना त्यांचे हक्क मिळायलाच हवेत आणि आपला त्यांना पूर्ण पाठिंबा आहे, असे त्यांनी म्हटले आहे. मात्र, नागरिकांना वेठीस धरून आंदोलन करणे योग्य नाही, असे परखड मत त्यांनी व्यक्त केले.

परब यांनी आपल्या संपर्क कार्यालयात पत्रकारांशी बोलताना सांगितले की, सफाई कामगारांना त्यांचे भविष्य निर्वाह निधीचे (PF) पैसे मिळणे हा त्यांचा हक्क आहे आणि या मागणीला माझा पूर्ण पाठिंबा आहे. नगर परिषदेचे कर्तव्य शहरातील सुमारे ४० हजार करदात्या नागरिकांना मूलभूत सुविधा पुरवणे हेदेखील आहे. त्यामुळे काम बंद आंदोलनामुळे नागरिकांच्या आरोग्याशी खेळणे योग्य नाही.

परब यांनी माजी नगराध्यक्ष बबन साळगावकर यांचे नाव न घेता, काही मंडळी जनतेला वेठीस धरत असल्याचा आरोप केला. ते म्हणाले, “कामगारांचा पगार कोणाच्या फोनमुळे काढण्यात आला, याची आधी माहिती घ्या.”

त्याचप्रमाणे, कामगारांची ६५ लाख रुपयांची थकबाकी ठेकेदाराने द्यावी ही मागणी योग्य आहे, पण आरोप करणाऱ्यांचे दावे खरे आहेत का, याची खात्री केली पाहिजे. कामगारांना त्यांचे पैसे कायदेशीर मार्गाने मिळायला हवेत. ‘मी स्वतः पुढाकार घेईन’

यावेळी परब यांनी सांगितले की, नगर परिषदेने नेमलेले ठेकेदार बाहेरचे असले तरी, प्रत्यक्ष सेवा पुरवणारे पोट-ठेकेदार स्थानिकच आहेत. त्यामुळे त्यांना स्थानिक कामगारांची व्यथा माहिती असायला हवी. जर ठेकेदाराकडून कामगारांवर अन्याय होत असेल तर मी स्वतः भविष्य निर्वाह निधीची रक्कम मिळवून देण्यासाठी पुढाकार घेईन, असा विश्वासही त्यांनी व्यक्त केला.

परब यांनी यावेळी, “जनतेने नाकारलेले काही नेते पुन्हा सक्रिय होण्याचा प्रयत्न करत आहेत,” असा आरोपही केला.