🛑सावंतवाडीत मटका जुगारावर पोलिसांचा छापा.;मोबाईल,रोख रक्कम जुगाराचे साहित्य जप्त.

🖋️लोकसंवाद /- सावंतवाडी.

सावंतवाडी शहरात दिवसाढवळ्या सुरू असलेल्या मटका जुगारावर अखेर पोलिसांनी धडक कारवाई केली आहे. कोलगाव (निरुखेवाडी) येथील संजय वसंत नाईक (५६) याला रंगेहात पकडण्यात आले असून त्याच्या सांगण्यावरून सावंतवाडीतील बुकी मुजीब शेख याच्यावरही गुन्हा दाखल करण्यात आला आहे.

काल सायंकाळी ओमकार जनरल स्टोअर समोर सहाय्यक पोलीस निरीक्षक शिंदे यांच्या पथकाने ही कारवाई केली. नाईक आपल्या पान टपरीत बसून मोबाईलद्वारे व्हॉट्सअ‍ॅपवरून मटक्याचे आकडे स्वीकारताना गजाआड झाला. चौकशीत त्याने हे आकडे थेट बुकीला पाठवत असल्याचे उघड केले.

पोलिसांनी कारवाईदरम्यान २० हजार रुपये किमतीचा मोबाईल, रोख ११०० रुपये आणि जुगाराचे साहित्य जप्त केले आहे. या धाडसी ऑपरेशनमध्ये जमादार निलेश परब, हवालदार अनिल धुरी आणि महेश जाधव यांनी सहभाग घेतला.
या कारवाईमुळे परिसरात सुरू असलेल्या अवैध धंद्यांना चांगलाच चाप बसला असून, पुढील तपास पोलिसांकडून सुरू आहे.