🛑केरोसीन ओतून जाळून मारल्याच्या आरोपातून मोहन सावंत यांची निर्दोष मुक्तता..

🖋️लोकसंवाद /- ओरोस.

आरोपी मोहन नामदेव सावंत याने हडपीड,ता. देवगड येथे रहाणारे व मुंबई रेल्वे पोलीसातून निवृत्त झालेले पोलीस कर्मचारी मोहन देऊ राणे यांच्या अंगावर केरोसीन टाकून माचीसची काडी पेटवून टाकून जाळून मारले म्हणून प्रथमतः देवगड पोलीसांनी आरोपी मोहन नामदेव सावंत याच्याविरुध्द भा.द.वी. कलम ३०७ व ३२६ नुसार गुन्हा दाखल केला. मात्र भाजून जखमी झालेले फिर्यादी मोहन राणे हे ६ दिवसांनी मयत झाल्यामुळे देवगड पोलीसांनी आरोपी मोहन नामदेव सावंत याच्याविरुध्द भा.द.वी. कलम ३०२ प्रमाणे गुन्हा दाखल करुन दोषारोपपत्र दाखल केले.सदरकामी जिल्हा न्यायाधीश क्र.१ व अति. सत्र न्यायाधीश श्री. जे. पी. झपाटे साहेब यांनी आरोपीची सबळ पुराव्याअभावी निर्दोष मुक्तता केली. आरोपीतर्फे अॅड. अजित भणगे, अॅड. मिहीर भणगे, अॅड. स्वप्ना सामंत, अॅड. सुनिल मालवणकर, अॅड. तेजाली भणगे, अॅड. आशुतोष कुळकर्णी व अॅड. कौस्तुभ गावडे यांनी काम पाहिले.

यातील हकीगत अशी की, हडपीड गावात रहाणारा आरोपी मोहन नामदेव सावंत याची सासू ही मुंबई रेल्वे पोलीसात काम करणारे मोहन देऊ राणे यांची चुलत बहिण होती. तिने आरोपी यास तिच्या वहिवाटीच्या जमिनीत घर बांधण्यास जागा दिलेली होती. त्या घरावरुन व फिर्यादी याच्या बागेत जाणा-या वाटेवरुन फिर्यादी व आरोपी यांच्यात वाकडीक निर्माण झालेली होती. दिनांक १६.०९.२०१८ रोजी फिर्यादी हा आपल्या शेतामध्ये काजूच्या रोपांची लागवड करण्याकरीता गेलेला होता. तो घरी परत येत असताना आरोपी मोहन सावंत याचे घराकडे आला असता त्याने घरात लपवून ठेवलेले पेट्रोल व रॉकेल त्याच्या अंगावर पाठीमागून टाकले व माचीसची काडी पेटवून

फिर्यादीच्या अंगावर फेकली. अंगावरील पेट्रोलने पेट घेतल्याने त्याने जमिनीवर लोळण घेतली व बचावासाठी धावत रस्त्यावर आला. फिर्यादीला स्थानिक लोक व त्याचा भाऊ यांनी सरकारी दवाखान्यात नेले व तेथून के. ई. एम. रुग्णालयात पुढील उपचारासाठी नेले. तेथे पुरेशा सोयी उपलब्ध नसल्यामुळे कस्तुरबा रुग्णालय, मुंबई येथे उपचारासाठी नेले.परंतू दुर्देवाने घटनेपासून ६ व्या दिवशी फिर्यादी मोहन देऊ राणे याला मृत्यु आला.

याकामी सरकारी पक्षाने एकूण १८ साक्षीदार तपासले. त्यात ३ डॉक्टर्स, २ पंच व तपासी अंमलदार असे साक्षीदार होते. उरलेले, साक्षीदार सुधीर बाळकृष्ण राणे वगळता सर्व ऐकीव घटनेवर आधारीत होते. मात्र त्यांना फिर्यादी याने आपणास आरोपी याने केरोसीन टाकून मारल्याचे कथन केले व फिर्यादही दिली. याकामी मयत फिर्यादी याचे एकूण ३ मृत्युपूर्व जबाब नोंदविण्यात आलेले होते. त्यातील विसंगती व साक्षीदार सुधीर बाळकृष्ण राणे याने उलटतपासात दिलेल्या कबूल्या मे. न्यायालयाच्या निदर्शनास आरोपीचे वकील अॅड. अजित भणगे यांनी आणून दिल्या. विशेष म्हणजे, न्यायालयाच्या असे निदर्शनास आले की, दिनांक १९.०९.२०१८ रोजी नोंदविलेल्या मृत्युपूर्व जबाबावर फिर्यादी याच्या पायाचा अंगठा उठविण्यात आलेला होता तर दुसरे दिवशी म्हणजे २०.०९.२०१८ रोजी नोंदविण्यात आलेल्या मृत्युपूर्व जबाबावर डाव्या हाताचा अंगठा उठविण्यात आलेला होता. फिर्यादीत आरोपीचे पूर्ण नाव लिहिण्यात आलेले नव्हते. वैज्ञानिक विश्लेषणासाठी पाठविलेली प्लास्टीकची बुदली, आरोपी व फिर्यादी यांचे कपडे याच्यावर केरोसीनचा कोणताही अंश सापडून आला नाही. याचा विचार करुन जिल्हा न्यायाधीश क्र.१ व अति. सत्र न्यायाधीश श्री. जे. पी. झपाटे साहेब यांनी आरोपीची सबळ पुराव्याअभावी निर्दोष मुक्तता केली. आरोपीतर्फे अॅड. अजित भणगे, अॅड. मिहीर भणगे, अॅड. स्वप्ना सामंत, अॅड. सुनिल मालवणकर, अॅड. तेजाली भणगे, अॅड. आशुतोष कुळकर्णी व अॅड. कौस्तुभ गावडे यांनी काम पाहिले.