🛑दूध विक्रेत्याला मारहाण, दाम्पत्यावर गुन्हा दाखल..

✍🏼लोकसंवाद /- कणकवली.

दूध वितरणाचे काम करणारे विक्रांत भास्कर वावरे (२९, कोंडये मधलीवाडी) यांना मारहाण केल्याची फिर्याद कणकवली पोलीस ठाण्यात दाखल झाली आहे.त्यानुसार मारहाण करणारे सर्वेश कुलकर्णी व त्याची पत्नी (रा. कणकवली. – जळकेवाडी) यांच्याविरोधात गुन्हा दाखल करण्यात आला आहे.ही घटना शुक्रवारी सकाळी नऊ वाजण्याच्या सुमारास दिगवळे येथील नर्सरीनजीक घडल्याचे फिर्यादीत म्हटले आहे. फिर्यादीनुसार, विक्रांत यापूर्वी सर्वेश कुलकर्णी याच्याकडे दूध वितरणाचे काम करत होते. सध्या ते अन्य एकाकडे काम करतात. शुक्रवारी विक्रांत नेहमीप्रमाणे दुचाकीने दूध वितरणाचे काम करून नरडवे येथे पोहोचले. तेथून ते कणकवलीच्या दिशेने येण्यास निघाले. दिगवळे येथील नर्सरीजवळ समोरून येत असलेल्या सर्वेश व त्याच्या पत्नीने विक्रांत यांची दुचाकी थांबविली. त्यानंतर सर्वेश याने चिव्याच्या दांड्याने उजव्या मनगटावर मारहाण केल्याने विक्रांत दुचाकीवरून खाली पडले. त्यांनी सर्वेश याला ‘तू मला का मारले?’, अशी विचारणा केली. त्यावर सर्वेश याने यापुढे कणकवली – नरडवे लाईनला दूध टाकताना दिसलास तर परत मारणार’, अशी धमकी दिली. यावेळी सर्वेश व त्याच्या पत्नीने विक्रांत यांना पुन्हा मारहाण केली, असे फिर्यादीत म्हटले आहे.