🛑युवासेनेतर्फे आदित्य ठाकरेंच्या वाढदिवसानिमित्त 5000 वृक्षलागवडीचा संकल्प!

◼️ ‘आमची हाक, तुमचा प्रतिसाद’ अंतर्गत QR कोडद्वारे घरपोच झाड लावून मिळणार..

✒️लोकसंवाद /- कुडाळ.

कुडाळ शहराचा आज वेगाने विकास आणि विस्तार होत आहे, मात्र हे होत असताना अनेक नागरी आणि पर्यावरणीय सुविधा मागे पडत चालल्या आहेत. याचे गांभीर्य लक्षात घेऊन, युवासेना प्रमुख आदित्य ठाकरे यांच्या वाढदिवसाचे औचित्य साधत कुडाळ युवासेनेतर्फे एका विशेष आणि कौतुकास्पद पर्यावरणपूरक उपक्रमाचे आयोजन करण्यात आले आहे. या उपक्रमांतर्गत शहरात तब्बल ५००० झाडे लावण्याचा मानस असून, पाण्याची पातळी वाढवण्यासाठी आणि वाढते प्रदूषण रोखण्यासाठी हा महत्त्वाचा पाऊल उचलण्यात येत असल्याचे कुडाळचे नगरसेवक मंदार शिरसाट यांनी पत्रकार परिषदेत स्पष्ट केले.

शिवसेनेच्या माध्यमातून ‘आमची हाक, तुमचा प्रतिसाद’ ही एक अनोखी आणि आधुनिक योजना राबवण्यात येणार आहे. यासाठी एक विशेष QR कोड जनरेट केला जाणार असून तो कुडाळमधील जनतेपर्यंत पोहोचवला जाईल.

योजना कशी काम करणार? नागरिकांनी हा QR कोड स्कॅन करून आपली नोंदणी करायची आहे. आपल्याला आपल्या परिसरासाठी कोणते झाड हवे आहे, याची माहिती तिथे नोंदवल्यास थेट शिवसैनिक तुमच्या अंगणात येऊन ते झाड लावून देणार आहेत.

या मोहिमेत जमिनीतील पाण्याची पातळी वाढवण्यास मदत करणाऱ्या विशेष वृक्षांची निवड करण्यात आली आहे. यामध्ये प्रामुख्याने खालील झाडांचा समावेश असेल:
बेल, आवळा, करंज, मोहजनी
बहावा, चिंच, कुसुमी, कांचन.
“आपल्या आधीच्या पिढीने काही चांगल्या गोष्टी केल्या म्हणून आज आपण स्वच्छंदी जीवन जगत आहोत, म्हणूनच आपणही येणाऱ्या पिढीसाठी काहीतरी देणं लागतो या भावनेतून हा उपक्रम केला जात आहे,” असे मंदार शिरसाट यावेळी म्हणाले.
केवळ वृक्षलागवडच नव्हे, तर कुडाळमधील पाणीटंचाई दूर करण्यासाठी युवासेनेने ठोस पावले उचलली आहेत. यासाठी दोन प्रमुख मागण्या केल्या जाणार आहेत:
१. शाळांमध्ये रेन वॉटर हार्वेस्टिंग: कुडाळमधील शासकीय आणि निमशासकीय शाळांनी रेन वॉटर हार्वेस्टिंग (Rainwater Harvesting) करावे, या उद्देशाने युवासेनेचे शिष्टमंडळ लवकरच जिल्हाधिकाऱ्यांची भेट घेणार आहे.
२. नगरपंचायतीकडे कडक अंमलबजावणीची मागणी: कुडाळ नगरपंचायतीच्या मुख्य कार्यकारी अधिकाऱ्यांची (CEO) भेट घेऊन, नवीन इमारतींना परवानगी (Passing) देताना ज्या इमारतींमध्ये रेन वॉटर हार्वेस्टिंग असेल, त्यांनाच ‘ऑक्यूपेन्सी सर्टिफिकेट’ (भोगवटा प्रमाणपत्र) देण्यात यावे, अशी मागणी केली जाईल.
तसेच, ज्या घरांमध्ये रेन वॉटर हार्वेस्टिंग यंत्रणा कार्यरत असेल त्यांना property tax (घरपट्टी) मध्ये १० टक्के करसवलत देण्याचा शासनाचा जीआर (GR) आहे. या जीआरची कुडाळमध्ये काटेकोर अंमलबजावणी व्हावी, अशी मागणीही सीईओ यांच्याकडे केली जाणार आहे.
या सर्व उपक्रमांचा शुभारंभ व कार्यक्रम माजी खासदार विनायक राऊत, अरुण दुधवडकर आणि माजी आमदार वैभव नाईक यांच्या प्रमुख उपस्थितीत पार पडणार आहे. कुडाळकरांनी या पर्यावरण मोहिमेत मोठ्या संख्येने सहभागी होऊन आपल्या परिसरा हिरवागार करावा, असे आवाहन युवासेनेतर्फे करण्यात आले आहे.