🛑कणकवली -ओटव येथील चोरीच्या गुन्ह्यातील दोन आरोपींच्या गुन्हा अन्वेषणच्या पथकाने मुसक्या आवळल्या..

◼️मिराभाईंदर येथुन आरोपींना अटक..

✒️लोकसंवाद /- कणकवली.

सिंधुदुर्ग जिल्ह्यात खुन, घरफोडी, चोरी, दरोडा, विनयभंग, जबरी चोरी यासह विविध गुन्ह्यांचा छडा लावण्याचे काम सिंधुदुर्ग गुन्हा अन्वेषण विभाग शिताफीने करत आहे. त्यामुळे अनेक गुन्ह्यांचा उलघडा होण्यास मदत होणार झाली आहे. गेल्या तीन दिवसापुर्वी ओटव येथील एका वृद्धेकडील सोन्याचा ऐवज जबरदस्ती चोरी करत संशयीत आरोपी साईल उर्फ सिद्धेश मिलिंद रसाळ (वय 21, रा. वसईरोड ठाणे), मुकेश महेंद्र पाटणे (वय 28, रा. साईनाथनगर विरार) या दोघांनी पळ काढला होता. या गुन्ह्यातील दोन्ही आरोपांनी गुन्हा अन्वेषण शाखेने शनिवारी सायंकाळी मुंबई भाईंदर येथुन सापळा रचत बेड्या ठोकल्या आहेत.

याबाबत वृत्त असे की, ओटव ओटववाडी येथील फिर्यादी सुवर्णा नारायण रावले (वय 66) हीच्याकडील 19 ग्रॅम 500 मीली दागिने सुमारे 1 लाख 45 हजार रुपयाचा ऐवजाची जबरी चोरी बुधवार २२ रोजी सकाळी ११.३० वाजण्याच्या सुमारास केली होती. याप्रकरणी सुर्वणा नारायण रावले (वय ६६, रा. ओटव-ओटववाडी) यांनी दिलेल्या फिर्यादीनुसार दोन आरोपींविरोधात कणकवली पोलीस ठाण्यात गुन्हा दाखल करण्यात आला होता.

सिंधुदुर्ग गुन्हा अन्वेषण विभागाच्यावतीने तांत्रिक विश्लेषण व मानवी कौशल्य वापरत गुन्हा घडल्यापासुन अवघ्या तीन दिवसांत आरोपींना ताब्यात घेण्यात यश मिळवले आहे. संशयीत आरोपी साईल रसाळ व मुकेश पाटणे हे दोघेही मुंबईत असल्याचे निष्पन्न झाले होते. त्यानुसार मिराभाईंदर परिसरात आरोपींच्या शोधार्थ गुन्हा अन्वेषण विभागाने सापळा रचला. या सापळ्यात अलगत संशयीत आरोपी साईल रसाळ व मुकेश पाटणे दोघेही अडकले. या दोन्ही आरोपींना शनिवारी सायंकाळी ताब्यात घेवुन रविवारी सकाळी कणकवलीत आणण्यात आले. या दोन्ही आरोपींना गुन्ह्याच्या अनुषंगाने तपासासाठी कणकवली पोलीसांच्या ताब्यात देण्यात आले आहे.

ही कारवाई पोलीस अधिक्षक डॉ. मोहन दहीकर, अप्पर पोलीस अधिक्षक नयमी साटम यांच्या मार्गदर्शनाखाली स्थानिक गुन्हा अन्वेषण शाखेचे पोलीस निरिक्षक प्रविण कोल्हे यांच्या नेतृत्वाखाली ही कारवाई पोलीस उपनिरिक्षक हनुमंत भोगले, सहाय्यक पोलीस निरिक्षक राजु जामसंडेकर, हवालदार ज्ञानेश्वर टवटे, किरण देसाई, व्हिल्सन डिसोजा यांच्या पथकाने केली.

गुन्हा अन्वेषण शाखेचे टिमवर्क-सिंधुदुर्ग जिल्ह्यात कानाकोप-यात होणारे गुन्हे उघडकीस आणताना पोलीसांसमोर अनेक अडचणी असतात. पोलीस अधिक्षक डॉ. मोहन दहीकर, अप्पर पोलीस अधिक्षक नयमी साटम यांच्या आदेशानुसार स्थानिक पोलीसांच्या मदतीने गुन्हे उघडकीस आणण्यासाठी सद्या सिंधुदुर्ग गुन्हा अन्वेषण विभाग यशस्वी कामगिरी बजावताना दिसत आहे. गेल्या वर्ष-दिड वर्षात खुन, दरोडा, घरफोडी, जबरी चोरी, विनयभंग यासह विविध गुन्ह्यांचा छडा लावण्याचे काम गुन्हा अन्वेषण विभागाने उघडकीस आणले आहेत. त्या आरोपींना महाराष्ट्राच्या कानाकोप-यासह कर्नाटक, गोवा, दिल्ली व अन्य राज्यामधुन देखील अटक केली आहे. सराईत गुन्हेगारांना त्यांच्या भागातुन गुन्ह्यात अटक करुन धाडसी कारवाई जिल्हा अन्वेषण विभागाकडुन टिमवर्क पद्धतीने केली जात आहे. त्याबद्दल सर्वच स्तरातुन पोलीस दलाचे कौतुक होत आहे.