🛑बांदयात आढळले मृत माकड.

✒️लोकसंवाद /- सावंतवाडी.

सावंतवाडी तालुक्यातील बांदा खालची सटमटवाडी येथे मृत अवस्थेत माकड आढळून आल्याने परिसरात भितीच वातावरण निर्माण झाले आहे. यापूर्वीचे माकडतापाचे प्रकार बघता या मृत माकडामुळे ग्रामस्थांत भिती निर्माण झाली आहे. उद्या या माकडाच्या मृतदेहाचे शवविच्छेदन करून त्याचा नमुना अहवालासाठी पाठवण्यात येणार असल्याची माहिती प्रशासनाकडून देण्यात आली आहे.

या घटनेची माहिती मिळताच वन विभागाची टीम घटनास्थळी दाखल झाली. त्यांनी माकडाचा मृतदेह ताब्यात घेतला आहे. हा मृतदेह वनविभागाच्या कार्यालयात ठेवण्यात आला असून उद्या पशू वैद्यकीय अधिकाऱ्यांच्या माध्यमातून शवविच्छेदन करून नमूना वैद्यकीय अहवालासाठी पाठवण्यात येणार असल्याची माहिती वनक्षेत्रपाल सुहास पाटील यांनी दिली. तसेच यापूर्वीही आरोग्य विभागाच्या टीमकडून तपासणी करण्यात आली होती. मात्र, त्यावेळी माकडतापासारखी परिस्थिती आढळून आलेली नसल्याचेही त्यांनी सांगितले.

दरम्यान, सटमटवाडी येथील ग्रामस्थांनी पशू वैद्यकीय अधिकाऱ्यांना या घटनेबाबत सांगण्यासाठी फोन केला असता त्यांच्याकडून योग्य वागणूक भेटली नसल्याची तक्रार केली. याबाबत पशू वैद्यकीय अधिकारी डॉ. विठ्ठल कराळे यांना विचारलं असता ते म्हणाले, वन विभागाकडून याबाबत माहिती मिळण अपेक्षित होतं. मात्र, त्यांना रेंज नसल्याने ग्रामस्थांनी फोन केला. त्यातून गैरसमज निर्माण झाल्याचे त्यांनी सांगितले. तसेच उद्या सकाळी त्या मृत माकडाचे शवविच्छेदन करून वैद्यकीय अहवालासाठी नमुना पाठवण्यात येणार असल्याचे त्यांनी सांगितले. त्यामुळे या अहवालाकडे ग्रामस्थांचे लक्ष लागून राहिले आहे.