🛑सावंतवाडी शहरात भटक्या कुत्र्यांचा प्रश्न पुन्हा गंभीर.;25 जणांचा घेतला चावा..

✒️लोकसंवाद /- सावंतवाडी.

सावंतवाडी शहरात भटक्या कुत्र्यांचा प्रश्न पुन्हा एकदा गंभीर स्वरूपात समोर आला असून शासकीय विश्रामगृहाजवळील बांदेकर खानावळ परिसरात एका आक्रमक कुत्र्याने तब्बल वीस ते पंचवीस नागरिकांचा चावा घेतल्याची धक्कादायक घटना घडली आहे. या घटनेमुळे शहरात भीतीचे वातावरण निर्माण झाले असून नागरिकांनी नगरपरिषद प्रशासनाच्या भूमिकेवर तीव्र नाराजी व्यक्त केली आहे.मिळालेल्या माहितीनुसार, या परिसरात गेल्या काही दिवसांपासून एक कुत्रा अत्यंत आक्रमक वागणूक देत होता. स्थानिकांनी वारंवार याबाबत प्रशासनाला सूचना दिल्या होत्या, मात्र कोणतीही ठोस कारवाई करण्यात आली नाही. अखेर या कुत्र्याने अचानक नागरिकांवर हल्ला करत अनेकांना जखमी केले. जखमींमध्ये , महिला आणि ज्येष्ठ नागरिकांचाही समावेश असल्याचे सांगितले जात आहे.या हल्ल्यात प्रसिद्ध बिल्डर दिनेश नागवेकर यांनाही गंभीर दुखापत झाली असून त्यांच्या पायाला कुत्र्याने चावा घेतला आहे. त्यांनी या प्रकरणाला अत्यंत गांभीर्याने घेत नगरपरिषद प्रशासनाविरोधात संताप व्यक्त केला आहे. “शहरात भटक्या कुत्र्यांचा वाढता उपद्रव हा प्रशासनाच्या निष्काळजीपणाचा परिणाम आहे. नागरिकांच्या जीवाशी खेळ चालला आहे,” अशी तीव्र प्रतिक्रिया नागवेकर यांनी दिली.नागवेकर यांनी सांगितले की, ते लवकरच नगरपरिषद प्रशासनाविरोधात आणि या कुत्र्यांना खाद्य पुरवणाऱ्या संबंधित हाऊसिंग सोसायटीविरोधात पोलिसांत तक्रार दाखल करणार आहेत. एवढेच नव्हे तर नागरिकांच्या जीविताला धोका निर्माण झाल्यामुळे ते एक कोटी रुपयांचा नुकसानभरपाई दावा देखील दाखल करण्याच्या तयारीत आहेत.सावंतवाडी शहरात भटक्या कुत्र्यांचा प्रश्न नवीन नाही. अनेक वर्षांपासून नागरिक या समस्येला सामोरे जात आहेत. शहरातील विविध भागांमध्ये कुत्र्यांचे टोळके फिरताना दिसतात. रात्रीच्या वेळी तर हा धोका अधिकच वाढतो. अनेकदा हे कुत्रे दुचाकीस्वारांच्या मागे लागतात, पादचाऱ्यांवर भुंकतात आणि काही वेळा हल्लाही करतात.या पार्श्वभूमीवर नगरपरिषद प्रशासनाने कुत्र्यांचे निर्बीजिकरण, लसीकरण आणि त्यांचे पुनर्वसन यासाठी प्रभावी योजना राबवणे अपेक्षित होते. मात्र प्रत्यक्षात कोणतीही ठोस आणि सातत्यपूर्ण मोहीम दिसून येत नाही. नागरिकांच्या तक्रारींकडे दुर्लक्ष केले जात असल्याची भावना वाढत आहे.अलीकडील काही घटनांनी नागरिकांच्या भीतीत आणखी भर घातली आहे. उत्तर प्रदेशमधील एका मुलाला कुत्र्याने चावा घेतल्यानंतर त्याला रेबीज झाला आणि त्याचे वर्तन कुत्र्यासारखे झाल्याचे व्हिडिओ सोशल मीडियावर मोठ्या प्रमाणात व्हायरल झाले होते. तसेच पुण्यात एका महिलेला कुत्र्यांच्या टोळक्याने हल्ला करून ठार मारल्याची घटना देखील समोर आली होती. या घटनांमुळे नागरिक अधिकच भयभीत झाले आहेत.सामाजिक कार्यकर्त, राजु मसुरकर यांनी कुत्र्यांच्या चाव्यामुळे रेबीजचा धोका अत्यंत गंभीर असतो. वेळेवर उपचार न घेतल्यास हा आजार प्राणघातक ठरू शकतो. त्यामुळे अशा घटनांकडे हलक्याने पाहणे धोकादायक आहे. सावंतवाडीत घडलेल्या या प्रकारानंतर आरोग्य विभागाने तातडीने उपाययोजना करण्याची गरज व्यक्त केली आहे.दरम्यान, स्थानिक नागरिकांनी प्रशासनाविरोधात संताप व्यक्त करत तात्काळ कारवाईची मागणी केली आहे. “आम्ही कर भरतो, पण सुरक्षा मिळत नाही. रोज घराबाहेर पडताना भीती वाटते. प्रशासन झोपेत आहे का?” असा सवाल एका नागरिकाने उपस्थित केला.विशेष म्हणजे, काही ठिकाणी नागरिकांकडून भटक्या कुत्र्यांना अन्न दिले जाते. प्राणीप्रेम ही चांगली गोष्ट असली तरी त्यातून निर्माण होणाऱ्या समस्यांकडे दुर्लक्ष करता येणार नाही. अशा कुत्र्यांचे योग्य व्यवस्थापन न झाल्यास ते आक्रमक होण्याची शक्यता वाढते. त्यामुळे याबाबत स्पष्ट नियम व अंमलबजावणी आवश्यक आहे.सावंतवाडीतील ही घटना प्रशासनासाठी धोक्याची घंटा आहे. जर तातडीने प्रभावी उपाययोजना करण्यात आल्या नाहीत, तर भविष्यात आणखी गंभीर घटना घडण्याची शक्यता नाकारता येत नाही. नागरिकांच्या सुरक्षेला प्राधान्य देत नगरपरिषद प्रशासनाने जबाबदारीने आणि तातडीने कार्यवाही करणे अत्यावश्यक आहे.सध्या तरी सावंतवाडीकर भीतीच्या छायेत जीवन जगत असून “आता तरी प्रशासन जागे होईल का?” हा प्रश्न सर्वांच्या मनात आहे.