🛑कसाल ग्रामपंचायत हॉल येथे महसूल शिबिराचे आयोजन..

✒️लोकसंवाद /- कुडाळ.

महाराष्ट्र शासन महसूल व वन विभाग यांचेकडील शासन निर्णय क्रमांक मराअ-2026/प्र.क्र.01/समन्वय-1 दिनांक 18/02/2026 अन्वये तहसील कार्यालय, कुडाळमार्फत ‘छत्रपती शिवाजी महाराज महाराजस्व समाधान शिबिर अभियान (टप्पा-१)” अंतर्गत कसाल मंडळ स्तरावर दि. 14/03/2026 रोजी सकाळी ठिक 10.00 वाजता कसाल ग्रामपंचायत हॉल, कसाल येथे महसूल शिबिराचे आयोजन केले असल्याची माहिती प्रभारी तहसीलदार अमरसिंह जाधव यांनी दिली. कुडाळ तालुक्यातील सर्वसामान्य नागरिक, शेतकरी, शेतमजूर, विद्यार्थी व महिलांसाठी महसूल विभागातील महत्वाच्या १५ सेवांचा लाभएकाच दिवशी देण्यासाठी हे विशेष अभियान राबविण्यात येत आहे.

या शिबिरांमध्ये प्रलंबित फेरफार, ७/१२ मधील चुकीची दुरुस्ती, डिजिटल स्वाक्षरीचे ७/१२व ८-अ उताऱ्यांचे वाटप, उत्पन्न, रहिवासी व जात प्रमाणपत्र, नॉन-क्रिमिलेअर प्रमाणपत्र, अकृषिक (NA) परवानगी, अकृषिक तरतुदीबाबत मार्गदर्शन व सुधारणा, ‘सनद” प्रक्रियेची माहिती, सामाजिक अर्थसहाय्य योजनांचे (संजय गांधी योजना) लाभ मंजूर करणे, विद्यार्थ्यासाठी दाखले वाटप, तुकडेबंदी कायद्या उल्लंघन प्रकरणांचा निपटारा, घरांसाठी पटटे वाटप व ई- मोजणी अर्ज, Agristack शेतकरी नोंदणी, पीएम किसान नोंदणी, वर्ग 2 चे वर्ग करणेबाबतची प्रकरणे, आयुष्यमान भारत कार्ड, रेशनकार्ड वरील नाव कमी-जास्त करणे तसेच भूसंपादन व अकृषिक परवानगी प्रकरणी ‘कमी-जास्त पत्रके’ तयार करून गाव दप्तर अद्यावत करण्याची कामे येणार करण्यात आहेत. याचबरोबर संबंधित सेवा विषयक अर्जही स्विकारण्यात येणार आहेत.

कुडाळ तालुक्यातील कसाल मंडळातर्गत गावातील नागरिकांनी तसेच विद्यार्थ्यांनी सदर दिवशी आयोजित केलेल्या शिबिरात आवश्यक कागदपत्रांसह उपस्थित राहून महसूल विभागाच्या सेवांचा लाभघ्यावा असे आवाहन प्रभारी तहसीलदार अमरसिंह जाधव यांनी केले आहे.