🛑आयशर टेम्पो मधुन गोवा बनावटी दारुची तस्करी करणारा आरोपी कुडाळ पोलीस ठाण्याकडून जेरबंद.

◼️17 लाख 20 हजार रुपये किंमतीचा मुद्देमाल हस्तगत.

✒️लोकसंवाद /- कुडाळ.

गोवा राज्यातुन महाराष्ट्र राज्यात चोरटी गोवा बनावटीची दारुची तस्करी केली जाते. गोवा बनावटी दारुच्या व्यसनापायी अनेक संसार उद्ध्वस्थ झालेले आहेत. गोवा राज्यातुन येणारी अवैध दारुवर आळा बसावा याकरीता नमुद तस्करांवर कायदेशीर कारवाई करण्याकरीता मा. पोलीस अधीक्षक सिंधुदुर्ग श्री मोहन दहीकर, मा. अपर पोलीस अधीक्षक सिंधुदुर्ग कु. नयोमी साटम यांनी सर्व पोलीस ठाणे प्रमुख यांना आदेश दिलेले होते. त्याप्रमाणे पोलीस विभागामार्फत अवैध दारु वाहतुक करणारे इसमांबाबत माहीती मिळवण्याचे काम सुरु होते.

दि.09.03.2026 रोजी कुडाळ पोलीस टाण्याचे पोलीस निरीक्षक राजेंद्र मगदुम यांना मुंबई गोवा महामार्गावरुन गोवा राज्यातून सिंधुदुर्ग जिल्हयामार्गे रत्नागिरी राजापूर येथे आरोपी शाबाज अब्दुल गोरे, वय 27 वर्षे रा. माणगांव मुस्लिमवाडी ता कुडाळ हा आपले ताब्यातील आयशर टेम्पो क्र MH-07-AH-3115 मधुन अवैध वाहतुक करणार असल्याची विश्वसनीय बातमी मिळाली. त्याअनुषंगाने पोलीस निरीक्षक राजेंद्र मगदूम यांनी मुंबई गोवा महामार्गावर सापळा रचुन आरोपी शाबाज अब्दुल गोरे यास आयशर टेम्पो क्र MH-07-AH-3115 सह जेरबंद केले. आरोपीचे ताब्यातील टेम्पोमध्ये गोवा बनावटी दारुचे एकूण 150 बॉक्स मिळून आले. आरोपीचे ताब्यातुन 7 लाख 20 हजार रुपये किंमतीची दारु व आयशर टेम्पो असा एकूण 17 लाख 20 हजार रुपये किंमतीचा मुद्देमाल हस्तगत करण्यात आलेला आहे. नमुद गुन्हयात आरोपी शाबाज अब्दुल गोरे व टेम्पो मालक अभिप भालचंद्र चव्हाण रा. कुणकेश्वर, खालचीवाडी, ता देवगड यांना अटक करण्यात आलेली आहे. नमुद गुन्हयाचा तपास कुडाळ पोलीस करीत आहेत.

सदरची कारवाई ही मा. पोलीस अधीक्षक सिंधुदुर्ग श्री मनोज दहीकर, मा. अपर पोलीस अधीक्षक सिंधुदुर्ग कु. नयोमी साटम, मा उपविभागीय पोलीस अधिकारी श्री विनोद कांबळे यांचे मार्गदर्शनाखालील कुडाळ पोलीस ठाण्याचे पोलीस निरीक्षक राजेंद्र मगदूम, पोलीस अंमलदार कृष्णा केसरकर, सखाराम भोई, आनंद पालव, योगेश वेंगुर्लेकर, कृष्णा परुळेकर, स्वप्नील चव्हाण, होमगार्ड मेस्त्री यांनी केलेली आहे.