🛑सिंधुदुर्ग जिल्हा आरोग्य विभागाला राज्यस्तरावर आरोग्यरत्न पुरस्कार जाहीर.

✒️लोकसंवाद /-सिंधुदुर्गनगरी.

महाराष्ट्र शासनाच्या सार्वजनिक आरोग्य विभागामार्फत आयोजित वंदनीय बाळासाहेब ठाकरे आरोग्यरत्न पुरस्कार व महाआरोग्य सन्मान सोहळा – २०२६ आज दिनांक २२ फेब्रुवारी २०२६ रोजी मुंबई येथील यशवंतराव चव्हाण सभागृहात पार पडणार आहे. या सोहळ्यात सार्वजनिक आरोग्य मंत्री प्रकाशजी आबिटकर व अन्य मान्यवरांच्या हस्ते विविध पुरस्कारांचे वितरण करण्यात येणार आहे.

या वर्षीच्या सन्मान सोहळ्यात सिंधुदुर्ग जिल्ह्याने विविध श्रेणींमध्ये उल्लेखनीय यश मिळवले आहे.सन २०२५-२६ दरम्यान राबविण्यात आलेल्या कॅन्सर तपासणी मोहिम (NCD Portal Screening) अंतर्गत जिल्ह्याने राज्यात सिव्हिल सर्जन स्तरावर तसेच जिल्हा आरोग्य अधिकारी (DHO) स्तरावर द्वितीय क्रमांक पटकावला आहे.या कामगिरीबद्दल सिव्हिल सर्जन डॉ. श्रीपाद पाटील आणि जिल्हा आरोग्य अधिकारी डॉ. सई धुरी यांना राज्यस्तरीय सन्मान जाहीर करण्यात आला आहे.

याशिवाय, ग्रामीण रुग्णालय (RH) रँकिंगमध्ये उत्कृष्ट कार्यासाठी डॉ. प्रकाश पाटोडेकर यांना राज्यस्तरीय पुरस्कार प्रदान केला जाणार आहे. तसेच देवगड तालुक्यातील प्राथमिक आरोग्य केंद्र पडेल वैद्यकीय अधिकारी डॉ आशिष मोहोड व ग्रामीण रुग्णालय, देवगड यांना ही PHC रँकिंगमध्ये उल्लेखनीय कामगिरीबद्दल सन्मानित करण्यात येणार आहे. वैभववाडी तालुक्यातील कोकिसरे येथील आशा सेविका सौ. समीक्षा संतोष जठार यांना उत्कृष्ट कार्यासाठी राज्यस्तरीय आशा पुरस्कार जाहीर झाला आहे.

आरोग्य क्षेत्रातील नाविन्यपूर्ण व समर्पित कार्याचा गौरव करणारा हा सन्मान सोहळा मानाचा मानला जातो. सिंधुदुर्ग जिल्ह्याच्या या यशामुळे जिल्ह्याची राज्यस्तरीय प्रतिमा अधिक भक्कम झाली असून जिल्हा प्रशासनाने सर्व संबंधित अधिकारी व कर्मचाऱ्यांचे अभिनंदन केले आहे.