🛑मराठा आंदोलकांसाठी राज्यभरातून रसद..ज्वारी-बाजरीच्या भाकऱ्या,ठेचा,पिठलं-भात आणि पाण्याचा पुरवठा.

🖋️लोकसंवाद /- मुंबई.

मराठा आंदोलक मुंबईत दाखल झाल्यानंतर शहरातील उपहारगृहे आणि खानावळी बंद झाल्याचा आरोप आंदोलकांनी केला होता. त्यामुळे आंदोलकांना जेवणाची मोठी गैरसोय झाली. ही बाब राज्यभर पसरताच, विविध भागांतून ट्रक भरून पाण्याच्या बाटल्या, ज्वारी-बाजरी-तांदळाच्या भाकऱ्या, पोळ्या, भाजी, ठेचा, पिठलं-भात अशा खाद्यपदार्थांची रसद मुंबईत धडाधड पोहोचवण्यात आली.

सीएसएमटी आणि आझाद मैदान परिसरात रविवारी मोठ्या प्रमाणावर पाण्याच्या बाटल्या पोहोचल्या, तर भाकऱ्या – पोळ्या – चपातीचे ढीग उभारले गेले. शेंगदाणा-मिरचीचा ठेचा, कांदा-भाकर, बटाट्याची भाजी, उसळ, छोले-भात अशा पदार्थांनी आंदोलकांची सोय केली गेली. रात्रीच्या जेवणाची तयारीदेखील सायंकाळपासून युद्धपातळीवर सुरू होती.

दरम्यान, उद्धव ठाकरे यांनी विधानपरिषदेतील विरोधी पक्षनेते अंबादास दानवे यांच्यामार्फत मनोज जरांगे यांच्याशी फोनवर संवाद साधून जेवणाची सोय करण्याचे निर्देश दिले. त्यानुसार मुंबई मराठी पत्रकार संघात दुपारपासून स्वयंपाकाची तयारी सुरू करण्यात आली होती.