🛑पाट हायस्कूल मध्ये कांदळवन दिन साजरा.

🖋️लोकसंवाद /- कुडाळ.

मा.विभागीय वनधिकारी कांदळवन दक्षिण कोकण, माननीय सहाय्यक वनसंरक्षक कांदळवन दक्षिण विभाग यांच्या मार्गदर्शनाखाली  दिनांक २४ जुलै २०२५ रोजी “जागतिक कांदळवन दिनाचे” औचित्य साधून कांदळवन कक्ष व कांदळवन प्रतिष्ठान सिंधुदुर्ग यांच्या वतीने एस. एल. देसाई विद्यालय, पाट येथे “कांदळवन संवर्धन आणि जनजागृति विषयक” कार्यक्रम आयोजित करण्यात आला. सदरच्या कार्यक्रमास महाविद्यालयाचे प्राचार्य राजन हंजनकर, उपक्रम प्रमुख संदीप साळसकर, पर्यवेक्षक सयाजी बोंदर, कांदळवन कक्षचे वनपाल सुनील प्र. सावंत, वनरक्षक दत्ता मुकाडे, प्रकल्प समन्वयक जागृती गवंडे, दिगंबर तोरस्कर, सौरभ राऊळ, शुभम कांबळे उपस्थित होते. सदरच्या कार्यक्रमात प्राध्यापक संदीप साळसकर यांनी कार्यक्रमाची सुरुवात कांदळवन बद्दल थोडक्यात माहिती देऊन केली व कार्यक्रमाचे सूत्रसंचालन सांभाळले. मुख्याध्यापक राजन हंजनकर यांनी आपला कांदळवना सोबतचा अनुभव सगळ्यांसमोर मांडला व उपजिविकेचे साधन यावर बोलले. वनपाल सुनील सावंत यांनी कांदळवन संरक्षणाचे महत्त्व विद्यार्थ्यांना पटवून दिले तसेच कांदळवनाचे नियम व कायदे, कांदळवन कक्षा कडून राबविल्या जाणाऱ्या योजनां बाबत माहिती दिली तसेच वृक्षारोपण ही काळाची गरज आहे यावर सविस्तर मार्गदर्शन केले व मुलांना प्रत्येकी ५ झाडे लावण्याचे आव्हान केले. कांदळवन कक्षचे प्रकल्प समन्वयक जागृती गवंडे यांनी विद्यार्थ्यास कांदळवनांची ओळख,कांदळवनाला असणारे धोके व महत्त्व, कांदळवन प्रजाती, कांदळवनात आढळणारी जैवविविधता आणि त्यांचे संरक्षण याबाबत माहिती दिली. प्राध्यापक सयाजी बोंदर यांनी विद्यार्थ्यांना पर्यावरणातील बदल व संरक्षण यावर विद्यार्थ्यांना मार्गदर्शन केले. या कार्यक्रमास इयत्ता नववीचे ९५ विद्यार्थी उपस्थित होते.