महिलेशी अश्लील वर्तन केल्याप्रकरणी निवती उपसरपंच गोविंद जाधव यांच्यावर पोलीस ठाण्यात गुन्हा दाखल.

लोकसंवाद /- कुडाळ.

विवाहित महिलेचा छुपा पाठलाग करून तिच्याशी संपर्क करण्याचा तसेच वैयक्तिक ओळख वाढविण्यासाठी तिच्या मोबाईलवर ऑनलाईन असतेवेळी तिच्याशी बोलण्याचा प्रयत्न केल्याप्रकरणी निवती – मेढा उपसरपंच गोविंद विठोबा जाधव ( 35 )याच्यावर निवती पोलीस ठाण्यात गुन्हा दाखल करण्यात आला.ही घटना शुक्रवारी सकाळी घडली.याबाबत त्या महिलेने पोलिसात दिलेल्या फिर्यादीनुसार,फिर्यादी महिला काल सकाळी 10.25 वाजण्याच्या सुमारास एका दुकानावर जात असताना ,संशयीत गोविंद जाधव तिच्या मागून छुपा पद्धतीने पाठलाग करू लागला आणि तिच्याशी संपर्क करण्याचा प्रयत्न करू लागला.तसेच तिच्याशी वैयक्तिक ओळख वाढविण्यासाठी ती महिला मोबाईलवर ऑनलाईन असतेवेळी तिला मेसेज पाठवायचा आणि तिच्याशी बोलण्याचा प्रयत्न करीत होता.याबाबत त्या महिलेने निवती पोलीस ठाण्यात धाव घेत फिर्याद दाखल केली.त्यानुसार गोविंद याच्या विरोधात भारतीय न्याय सहिता कलम 78 (1) (i) 78 (1) (ii) गुन्हा दाखल करण्यात आला. निवती पोलीस ठाण्याचे सहायक पोलीस निरीक्षक भीमसेन गायकवाड यांच्या मार्गदर्शनाखाली हवालदार पंढरीनाथ भांगरे तपास करीत आहेत.