केर येथे हत्ती संकटानंतर आता “बिबट्या संकट” सापळा रचून पकडण्याची मागणी.

लोकसंवाद /- दोडामार्ग.

मोर्ले – केर रस्त्यावर प्रवाशांना दिसणारा बिबटया आता थेट घरापर्यंत पोहचल्याची घटना शनिवारी रात्री घडली. केर अवाटवाडी येथील एका ग्रामस्थांच्या खिडकीवर मांजरावर हल्ला करण्याच्या हेतूने धडक दिली असल्याची माहिती येथील ग्रामस्थ तेजस देसाई यांनी दिली. शिवाय सदर बिबट्याला सापळा रचून पकण्याची मागणीही त्यांनी केली आहे. याबाबत तातडीने वनविभागाने कार्यवाही करण्याची गरज आहे. हत्ती संकट झाले आता हे नाविन बिबट्या संकट आल्याने ग्रामवासिय भीतीच्या छायेखाली आहेत.

याबाबत श्री. देसाई यांच्याकडून मिळालेली माहिती अशी की, येथील ग्रामस्थ सगुण नाईक आणि ग्रामस्थांना मोर्ले केर रस्त्यावर बिबटया (बिबटया सदृश्य प्राणी) सातत्याने दिसायचा सदर बिबट्याने शिकार केली असावी आणि त्या परिसरात फिरत असावा असा ग्रामस्थांचा अंदाज होता. दरम्यान शनिवारी रात्री साडेदहा वाजण्याच्या सुमारास बिबट्याने केर अवाटवाडी येथील काशीराम धुरी या ग्रामस्थांच्या खिडकीवर धडक दिली. मोठा आवाज झाल्याने घरातील मंडळी पहायला आल्यावर त्यांना नखाच्या खुणा खिडकी आणि अन्य मातीचा भाग येथे दिसल्या शिवाय घरातील एक मांजरही सकाळी गायब झालेले समजले याबाबत श्री. देसाई यांना कल्पना देताच त्यांनी वनविभागाचे अधिकारी यांना याबाबत माहिती दिली असून त्यांनी घटनास्थळी जात माहिती घेतली.

*तातडीने पकड मोहीम हाती घ्या*

याबाबत ग्रामस्थ असे सांगतात, वनविभागाने घटनास्थळी जात माहिती घेतली याबाबत ती प्राथमिक कार्यवाही झाली असली तरी बिबटया उग्र हालचाली करत आहेत ते पाहता पकड मोहीम हाती घेणे हे महत्वाचे असून याबाबत तातडीने कारवाही होणे आवश्यक आहे.