🛑डमी परीक्षार्थी बनून महाराष्ट्र लोकसेवा आयोगाची फसवणूक केल्याच्या आरोपातून दोन्ही आरोपींची निर्दोष मुक्तता:

▪️आरोपीं तर्फे ॲड विवेक मांडककुलकर यांनी पाहिले काम.

✍🏼लोकसंवाद /- कुडाळ.

डमी परीक्षार्थी बनून महाराष्ट्र लोकसेवा आयोगाची फसवणूक केल्याच्या आरोपातून संशयित आरोपी गोविंद विष्णू नागरगोजे आणि सविता मुरलीधर बडे दोघेही रा.बीड यांची कुडाळ येथील मे.प्रथमवर्ग न्यायदंडाधिकारी श्री.जी.ए.कुलकर्णी यांनी सबळ पुराव्या अभावी निर्दोष मुक्तता केली. आरोपी तर्फे ॲड विवेक मांडकुलकर, ॲड प्रणाली मोरे यांनी काम पाहिले. तसेच ॲड. भुवनेश प्रभुखानोलकर, ॲड वृषांग जाधव यांचे सहकार्य लाभले.

सविस्तर वृत्त असे की आरोपींनी महाराष्ट्र लोकसेवा आयोगातर्फे घेण्यात येणाऱ्या कर सहाय्यक परीक्षा २०१६ करीता आपली खोटी ओळखपत्रे सादर करून डमी नावाने परीक्षा केंद्रात प्रवेश करून परीक्षा देत असताना मिळून आले म्हणून त्यांनी महाराष्ट्र लोकसेवा आयोगाची फसवणूक केली अशी फिर्याद विजय बापू वरेकर, नायब तहसिलदार, उपविभागीय अधिकारी कार्यालय यांनी कुडाळ पोलीस ठाणे येथे फिर्याद दिली होती. त्यानुसार भा.दं.वि कलम ४१९, ४६५, ४६८, ४७१ सह ३४ अंतर्गत गुन्हा दाखल करण्यात आला होता. सदर कामी सरकार पक्षातर्फे एकूण ७ साक्षीदार तपासण्यात आले होते. साक्षीदारांच्या जबाबातील तफावत आणि आरोपी तर्फे ॲड विवेक मांडकुलकर यांचा युक्तिवाद ग्राह्य मानून कुडाळ येथील मे.प्रथमवर्ग न्यायदंडाधिकारी श्री.जी.ए.कुलकर्णी यांनी सबळ पुराव्या अभावी निर्दोष मुक्तता केली.