🛑 पोलीस पाटील नियुक्ती का थांबली प्रशासन उत्तर नाही ?

✍🏼लोकसंवाद /- ओरोस.

मालवण आणि कुडाळ तालुक्यातील पोलीस पाटील भरतीत निवड झालेल्या १३८ उमेदवारांची नियुक्तीपत्रे रखडल्याने ती देण्याची कार्यवाही तात्काळ करावी,यासाठी हे उमेदवार आता एकवटले आहेत.मंगळवारी जिल्हाधिकाऱ्यांची भेट घेत त्यांनी नियुक्तीपत्र देण्याची मागणी केली.दरम्यान २३ ऑगस्टपर्यंत कार्यवाही न झाल्यास बेमुदत उपोषण छेडणार असल्याची माहिती सुनील खरात आणि सतीश माडये त्यांनी पत्रकारांशी बोलताना दिली.पोलीस पाटील भरतीचा कार्यक्रम राबवून अंतिम निवड झालेल्या उमेदवारांची यादी १५ मार्च रोजी प्रसिद्ध करण्यात आली होती. मात्र पाच महिन्यांपेक्षा जास्त काळ लोटला,तरी नियुक्ती पत्र देण्यात आलेली नाहीत.याबाबत अनेकवेळा लक्ष वेधण्यात आले.मात्र लवकरच नियुक्तीपत्र दिली जातील, असे सांगून वेळ मारून नेली जात आहे. दरम्यान ही नियुक्ती प्रक्रिया का थांबवली आहे.याचे उत्तरही प्रशासनाकडून दिले जात नाही.

कुडाळ प्रांताधिकाऱ्यांच्या निवड यादीनुसार मालवण तालुक्यातील ७८, तर कुडाळ तालुक्यातील ६० अशा १३८ उमेदवारांची निवड झाली आहे. कागदपत्र पडताळणीची प्रक्रियाही पार पडली आहे. त्यामुळे नियुक्तीपत्राच्या प्रतीक्षेत असलेले उमेदवार आता एकत्र आले असून यापुढे आंदोलनाचा पवित्रा घेणार असल्याचे स्पष्ट आहे.