🛑आडेली – कांबळेवीर येथील जागृत ग्रामस्थांनी उधळून लावला काळेथर दगड चोरीचा कट..

▪️तहसीलदारांनी पाहणी करून काळेथर दगड चोरणाऱ्यांवर कठोर कारवाई करावी ग्रामस्थांची मागणी..

✍🏼लोकसंवाद /- वेंगुर्ला.

आडेली- कामळेवीर येथील ग्रामस्थांच्या निदर्शनास आले की,ठेकेदार कंपनी ग्रामपंचायतीच्या एनओसीशिवाय आडेली – कांबळेवीर येथे काळेथर दगड चोरण्यासाठी १० फूट खोल व चार इंच रुंद असे २१ होल तयार करून त्यामध्यें जिलेटीन आणि अमोनियाच्या साहाय्याने संपूर्ण कामळेवीर परिसर हादरवणार पण तेवढ्यातच आडेली गावातील नागरिकांनी १७ फेब्रुवारी छापा मारून काम बंद पाडले व लगेच गावचे तलाठी सुभाष ठाकूर यांना कळवून शासनाने दिलेल्या परवानगीची फाईल घेऊन यायला सांगितले.त्याप्रमाणे तलाठी सुभाष ठाकूर हे घटनास्थळी कोणतेही पेपर न घेता दाखल झाले. त्यानंतर तलाठी ठाकूर यांनी धातुर मातुर उत्तरे देत पंचयादी घालायला नकार दिला.पण ग्रामस्थ आक्रमक झाल्यामुळे व कायद्याची जाणीव करून देताच तलाठी सुभाष ठाकूर यांचे धाबे दणाणले व सारवासारव करून पंचयादी घातली.त्याचवेळी घटनास्थळावर वेंगुर्ला पोलिस श्री सुतार हे सुरुवातीला दाखल झाले.

हा सर्व प्रकार महसूल विभागाचा असल्याचे दाखऊन वेंगुर्ला पोलिसांनी आपली जबाबदारी झटकली व अमोनिया आणि जिलेटीनने भरलेली संशयीत गाडी ताब्यात घ्यायला नकार दिला. तसेच तलाठी, पोलिस पाटील व कोतवाल यांना उत्खननासाठी वापरत असलेले मशिन्स हस्तगत करायला सांगितले.तलाठी ठाकूर यांनी मुद्देमाल ताब्यात लगेच घेऊ शकत नसल्याचे सांगत स्वतः पोलिस पाटील यांच्याबरोबर रात्रभर घटनास्थळी राहणार असल्याचे सांगत ग्रामस्थांना घालवले.पण काही वेळाने ग्रामस्थ नसल्याचे समजताच घटनास्थळावरून फरार झाले.आणि याचा फायदा घेत जिलेटीन आणि अमोनिया मायनिंग स्पॉटवरून पळवला.हा सगळा प्रकार ठेकेदाराला व अधिकाऱ्यांना वाचवण्यासाठी होत आहे असा ग्रामस्थांचा थेट आरोप आहे.

दुसऱ्या दिवशी १८ फेब्रुवारीला वन विभागाच्या अधिकाऱ्यांना पाचारण करण्यात आले व वनविभागाने ती जमीन वन विभागाच्या “identified forest” झोन मधली असल्याचे घोषित केले.तर वन विभागाने आपली पंचयादी करून काम थांबविण्याचे आदेश दिले.तर तलाठी यांनी सर्कल मॅडम निगोरे यांना पाचारण केलं.सर्कल निगोरे यांना ग्रामस्थांनी दिलेल्या परवानगीची फाईल दाखवायला सांगितली असता त्यांनी ती फाईल त्यांच्याकडे नसल्याचे सांगितले.तर सर्कल निगोरे यांनी उत्खननासाठी वापरलेल्या मशिन्स हस्तगत करायला नकार दिला.अखेर ग्रामस्थ आक्रमक झाले आणि तेथील काम बंद केले.यावेळी कुडाळचे वनपाल अनिल राठोड, वनक्षेत्रपाल संदिप कुंभार,मठ वनरक्षक सूर्यकांत सावंत,तलाठी सुभाष ठाकूर सर्कल सौ. निगोरे,कांबळेवीर आडेली येथील ग्रामस्थ दशरथ पेडणेकर,सचिन वेंगुर्लेकर,समिर कुडाळकर,संतोष पेडणेकर,आनंद गवस, प्रमोद सावळ,सौरभ पेडणेकर,जिवन कुडाळकर,पोलीस योगेश सराफदार पोलीस योगेश वेंगुर्लेकर आदि ग्रामस्थ मोठ्या संख्येने उपस्थित होते.