🛑निलेश राणे यांच्या आक्रमक भूमिकेनंतर शुक्रवारी रात्री उशिरा महाविकास आघाडीचे ५ नगरसेवकांसहीत १० ते १२ जणांवर कुडाळ पोलीस ठाण्यात गुन्हे दाखल.

✍🏼लोकसंवाद /- कुडाळ.

कुडाळ नगरपंचायतीच्या पटांगणावर शासनाच्या वतीने शुक्रवारी दुपारी ३ – ३० वाजता आयोजित केलेल्या संकल्प रथयात्रेच्या कुडाळ शहरी भागाच्या उद्घाटन कार्यक्रमावेळी मोदी सरकार या नावास आक्षेप घेत कुडाळ नगरपंचायतीचे उध्दव ठाकरे शिवसेना गटाचे उपनगराध्यक्ष किरण शिंदे,मंदार शिरसाट,उदय मांजरेकर,सचिन काळप,संतोष शिरसाट या महाविकास आघाडीतील नगरसेवकांसह इतर १० ते १२ लोकांनी जमाव करून घोषणाबाजी केली.तसेच कार्यक्रमाचे उद्घाटन करण्यास फिर्यादीस व शासकीय यंत्रणेत अटकाव केल्या प्रकरणी कुडाळ पोलीस ठाण्यात गुन्हा रजिस्टर नंबर:-३८८/२०२३ भा.द.वि.कलम १४३,१४९,१८६ व ५०६ या प्रमाणे सर्वावर गुन्हे दाखल करण्यात आले आहे.याबाबतची तक्रार कुडाळ नगरपंचायतीचे मुख्याधिकारी अरविंद आनंद नातू यांनी कुडाळ पोलिसांत दिल्यानंतर शुक्रवारी रात्री उशिरा ११ वाजून २४ वाजता वरील सर्वावर गुन्हे दाखल झाले आहेत.

कुडाळमध्ये भाजप व महाविकास आघाडीच्या कार्यकर्त्यांत शुक्रवारी जोरदार हमरीतुमरी झाली होती.महाविकास आघाडीतील कार्यकर्त्यांचा विरोध डावलून भाजपच्या कार्यकर्त्यांनी विकसित भारत संकल्प यात्रेचा जोरदार शक्ती प्रदर्शनाने शुभारंभ केला. या वादामध्ये भाजप व महाविकास आघाडीचे कार्यकर्ते आमने-सामने भिडले त्यांना नियंत्रित करण्यासाठी पोलीस आणि दंगल नियंत्रक पथक मागवण्यास आले होते.कुडाळ नगरपंचायत कार्यालय येथे विकसित भारत संकल्प यात्रा आली होती.या यात्रेवरून कुडाळ नगरपंचायतीच्या सभेमध्ये सत्ताधारी महाविकास आघाडीचे नगरसेवक व भाजपा नगरसेवक यांच्यामध्ये खडाजंगी झाली होती.ही खडाजंगी मोदी सरकार या नावावरून झाली होती. दरम्यान यात्रा शुक्रवारी कुडाळ नगरपंचायत येथे आल्यावर याला विरोध करण्यासाठी महाविकास आघाडीचे कार्यकर्ते गोळा झाले होते.आणि त्यांनी घोषणाबाजी केली.त्या ठिकाणी या यात्रेचे उद्घाटन करण्यासाठी भाजपचे कार्यकर्ते उपस्थित होते.त्यांनी मोदी सरकारच्या समर्थनार्थ घोषणा दिल्या यावरून दोन्ही गटांमध्ये शाब्दिक बाचाबाची झाली दोन्ही कार्यकर्ते एकमेकांच्या अंगावर धावून गेले. हे रोखण्यासाठी पोलिसांना बळाचा वापर करावा लागला.हा कार्यक्रम सुरू होत असतानाच सत्ताधारी गटाच्या नगराध्यक्षा सौ.अक्षता खटावकर, उपनगराध्यक्ष किरण शिंदे, नगरसेवक तथा गटनेते मंदार शिरसाट, नगरसेवक उदय मांजरेकर, नगरसेविका सौ. सई काळप, नगरसेविका सौ. श्रेया गवंडे, अतुल बंगे आदिंनी पुढे येत या यात्रेचे आम्ही स्वागत करतो मात्र यात्रेतील रथावर मोदी सरकार उल्लेख आहे.त्याला आमचा आक्षेप असल्याचे सांगत विरोध केला.यावेळी पोलिस निरीक्षक रूणाल मुल्ला यांनी सत्ताधारी गटाला समजाविण्याचा प्रयत्न केला मात्र सत्ताधारी गट आपल्या भुमिकेवर ठाम राहिला. त्यामुळे काहीसा गोंधळ सुरू झाला.

याच दरम्यान भाजपा गटाच्या नगरसेविका सौ. संध्या तेरसे यांनी कार्यक्रमाचे उद्घाटन करत कार्यक्रम सुरू केला. त्यामुळे सत्ताधारी गटाचे नगरसेवक आक्रमक झाले.नगरपंचायतचे नगराध्यक्ष, उपनगराध्यक्ष असताना उद्घाटनाचा मान विरोधकांना का दिला? असा प्रश्न यावेळी सत्ताधारी गटाच्या नगरसेवकांनी मुख्याधिकारी अरविंद नातू यांना केला. यावेळी पोलिस निरीक्षक रूणाल मुल्ला यांनाही सत्ताधारी गटाने खडेबोल सुनावले.कार्यक्रम सुरू होताच भाजप नगरसेवक पदाधिकारी, कार्यकर्त्यांनी मोदी सरकार समर्थनार्थ जोरदार घोषणाबाजी दिली. त्यानंतर या ठिकाणचे वातावरण चांगले तापुन गेले.परिस्थितीचे गांभिर्य पाहुन पोलिसांनी दंगल नियंत्रक पथकाला पाचारण केले. यावेळी दोन्ही गटांना बाजुला करण्याचे पोलिस व दंगल नियंत्रक पथकाने प्रयत्न केले मात्र दोन्ही बाजुकडील नगरसेवक, पदाधिकारी, कार्यकर्ते आपल्या भुमिकेवर ठाम राहिले, त्यामुळे पोलिस व दंगल नियंत्रक पथक हतबल झाल्याचे दिसुन आले.यावेळी भाजप नगरसेवक निलेश परब, चांदणी कांबळी, नगरसेविका प्राजक्ता बांदेकर, अॅड राजु कुडाळकर, आनंद शिरवलकर, राजु राऊळ, दादा साईल, मोहन सावंत आदींनी जोरदार विरोध करत त्यांच्यावर प्रश्नांचा भडीमार केला. त्यामुळे श्री. नातू माघारी परतले. त्यानंतर पोलिस निरीक्षक रूणाल मुल्ला आवाज कमी करण्यासाठी पुढे आले. त्याच दरम्यान गाडीत असलेले पोलिस रूपेश सारंग यांच्यावर भाजप गटाने प्रश्नांचा भडीमार केला. यावेळी पोलिस निरीक्षक रूणाल मुल्ला व भाजपा नगरसेवक पदाधिकाऱ्यांच्यात जोरदार शाब्दिक खडाजंगी झाली. कमी होतो न होतो तोच सत्ताधारी महाविकास आघाडी गटाकडुन सरकार विरोधात जोरदार घोषणाबाजी करण्यात आली.

यावेळी पुन्हा पोलिस निरीक्षक रूणाल मुल्ला सत्ताधारी गटाकडे धावून आले.सत्ताधारी व विरोधक या दोन्ही गटांना थोपविण्यात पोलिस व दंगल नियंत्रक पथकाची दमछाक झाली. याच दरम्यान उपविभागीय पोलिस अधिकारी संध्या गावडे दाखल झाल्या त्यांनी सत्ताधारी महाविकास आघाडी सरकारच्या गटाला शांत राहण्याची विनंती केली. मात्र सत्ताधारी गट आपल्या भुमिकेवर ठाम राहिला. अखेर भाजपा नगरसेवक व पदाधिकारी कार्यकर्त्यांनी कुडाळ नगरपंचायतीचे मुख्याधिकारी अरविंद नातू यांना आपल्या गटाकडे बोलावून घेत कार्यक्रमाची रूपरेषा उपस्थित नागरीकांना सांगण्याची विनंती केली.त्यानुसार श्री. नातू यांनी कार्यक्रमाची रूपरेषा सांगत विविध योजनांचा लाभ घ्या असे आवाहन केले.यावेळी सत्ताधारी गटाने कुडाळ नगरपंचायतच्या प्रथम नागरीक यांना डावलून पोलिसांनी हा कार्यक्रम कसा काय सुरू केला? असा सवाल उपस्थित करत पुन्हा एकदा मोदी सरकार विरोधात घोषणाबाजी देण्यात आली.यावेळी पोलिसांनी भाजप नगरसेवक पदाधिकाऱ्यांना बाजुला करण्याचा प्रयत्न केला, मात्र तो प्रयत्न फेल ठरला. याच दरम्यान भाजप जिल्हाध्यक्ष प्रभाकर सावंत यांनी यावेळी नियोजित वेळेच्या आधी कार्यक्रम कसा काय संपविला? असा प्रश्न मुख्याधिकाऱ्यांना विचारला. यावेळी श्री. प्रभाकर परब यांनी प्रशासनाच्या कारभाराविरोधात नाराजी व्यक्त करत प्रशासक म्हणुन तुम्ही कुचकामी आहात असा मुख्याधिकाऱ्यांवर आरोप केला. या गोंधळानंतर मुख्याधिकारी अरविंद नातू यांनी शुक्रवारी सायंकाळी उशिरा पोलिस स्थानकात धाव घेतली.

माजी खासदार निलेश राणे झाले कुडाळ पोलीस ठाण्यात आक्रमक

भाजपचे माजी खासदार निलेश राणे सुध्दा कुडाळ पोलीस ठाण्यात आक्रमक झाले.यावेळी भाजप कार्यकर्त्यांनी मोठी गर्दी केली होती.गुन्हे दाखल झालेच पाहिजेत अशी ठाम भुमिका निलेश राणे यांनी घेतल्याने अखेर मुख्याध्याधिकारी अरविंद नातू यांच्या तक्रारीनंतर कुडाळ नगरपंचायतीच्या ५ नगरसेवकांसह अन्य १० ते १२ लोकांवर कुडाळ पोलीस ठाण्यात गुन्हे दाखल झाले आहेत.