🛑गाय आडवी आल्याने मालवण – कुंभारमाठ मार्गावर झालेल्या अपघातात १ गंभीर..

✍🏼लोकसंवाद /- मालवण.

मालवण – कुंभारमाठ मार्गावरून दुचाकीने घरी जात असताना गाय आडवी आल्याने धडक बसून झालेल्या अपघातात राजेंद्र ऊर्फ राजू भिवाजी चव्हाण (वय-५०) रा. आनंदव्हाळ हे गंभीर जखमी झाले. त्यांना तात्काळ शहरातील ग्रामीण रुग्णालयात दाखल करण्यात आले.तेथून अधिक उपचारासाठी गोवा बांबुळी येथे हलविण्यात आले आहे. 25 मार्च सायंकाळी ७.३० वाजण्याच्या कुंभारमाठ येथे हा अपघात घडला.

चव्हाण हे सायंकाळी कुंभारमाठ येथे सुरू असलेले क्रिकेटचे सामने बघण्यासाठी थांबले होते. सायंकाळी ते आपल्या दुचाकीने आनंदव्हाळ येथे घरी परतत होते. याच दरम्यान फोंडेकर दवाखाना लगतच्या रस्त्यावर अचानक गाय आडवी आल्याने त्यांच्या दुचाकीची धडक बसून ते रस्त्यावर फेकले गेले. यात त्यांच्या डोक्यास गंभीर दुखापत झाली. ते रक्ताच्या थारोळ्यात पडले होते. स्थानिकांनी धाव घेतली. प्रसंगावधान राखत एका खाजगी वाहनातून तात्काळ जखमीना मालवण ग्रामीण रुग्णालयात दाखल केले. त्यांची प्रकृती चिंताजनक असल्याने प्राथमिक उपचारानंतर त्यांना अधिक उपचारासाठी तात्काळ गोवा बांबुळी येथे हलविण्यात आले आहे. अपघाताची माहिती मिळताच पोलिसही दाखल झाले होते.

दरम्यान कुंभारमाठ मार्गांवर रस्त्याच्या दोन्ही बाजूला खोदाई सूरू आहे. अगदी मुख्य रस्त्यालगतच असलेल्या या खोदाई मुळेही अपघात होऊ शकतात. अशी भीती काही ग्रामस्थांनी या निमित्ताने व्यक्त केली आहे.