🛑वसोली येथिल कुत्रेकोंड काॅजवेवरून अमीत धुरी युवक गेला वाहून.

🖋️लोकसंवाद /- कुडाळ.

माणगाव खोऱ्यात रात्री झालेल्या मुसळधार पावसामुळे वसोली- कुत्रेकोंड कॉजवेवरून अमित धुरी हा दुचाकीस्वार वाहून गेला तर त्याच्यासमवेत असलेला सहकारी सखाराम कानडे हा सुदैवाने बचावला. ही घटना काल रात्री ८.३० वाजण्याच्या सुमारास घडली. याबाबतची माहिती आपत्कालीन यंत्रणेला देण्यात आल्यानंतर एनडीआरएफ पथकाच्या माध्यमातून “त्या” युवकाचा शोध सुरू आहे.

सोमवारी सकाळपासून माणगाव खोऱ्यातील सह्याद्री पट्ट्यात पावसाचा जोर काहीसा वाढला होता, त्यामुळे वसोली कुत्रेकोंड कॉजवेंवर पाणी आले होते. त्याच दरम्यान माणगांव येथून मोटरसायकलने अमित धुरी आणि सखाराम कानडे हे दोन युवक शिवापूरला जात होते. त्यांची मोटरसायकल वसोली कुत्रेकोंड येथे आली असता त्यांनी कॉजेवरील पाण्याचा अंदाज न घेता कॉजवेवरील पाण्यातून जाण्याचा प्रयत्न केला मात्र कॉजवे वरील पाण्याचा प्रवाह जास्त असल्यामुळे मोटरसायकल पाण्याच्या प्रवाहाने खाली खेचली गेली. त्यात अमित धुरी हा युवक पुलाच्या खाली पडला व वाहून गेला त्याच्यासोबत बसलेला त्याचा सहकारी सुदैवाने बचावला. त्याने घटनास्थळी आरडाओरड केली मात्र रात्रीची वेळ असल्यामुळे त्याला कोणीच प्रतिसाद दिला नाही. त्यामुळे त्याही परिस्थितीत सखाराम कानडे या सहकाऱ्याने लगत असलेल्या वसोली येथील एका दुकानावर धाव घेत झालेला घटनाक्रम ग्रामस्थांना सांगितला. त्यानंतर सर्वत्र फोनाफोनी व धावाधाव सुरू झाली आहे पण रात्रीची वेळ असल्यामुळे सर्वच यंत्रणांना मर्यादा आहेत.
दरम्यान रात्री तहसीलदार विरसिंग वसावे आणि पोलीस निरीक्षक राजेंद्र मगदूम यांनी रात्रीच घटनास्थळी भेट दिली. या दुर्घटनेतून वाचलेल्या सखाराम कानडे याची त्यांनी भेट घेऊन घटनेची म घेतली. दरम्यान वाहून गेलेल्या अमित धुरी याचा शोध घेणे सुरु आहे. एनडीआरएफची टीम घटनास्थळी पोहोचली आहे.