🛑”कुणी पाणी देता का पाणी? ऐन उन्हाळ्यात नानेली सुतारवाडीकरांची तहानेने हाक!”

✒️लोकसंवाद /- समिल जळवी,कुडाळ.

जलजीवन मिशनअंतर्गत करोडो रुपये खर्च करून नानेली सुतारवाडी येथे विहीर बांधण्यात आली. विहिरीचे काम पूर्ण झाले असून विहिरीत मुबलक पाणीसाठाही उपलब्ध आहे. मात्र केवळ प्रशासकीय कार्यवाही रखडल्याने ग्रामस्थांना आजही पाण्यासाठी वणवण भटकावे लागत आहे.

विहिरीला आवश्यक वीज मीटर अद्याप बसविण्यात आलेला नाही. ग्रामपंचायतीकडून आवश्यक बक्षीसपत्राची प्रक्रिया पूर्ण न झाल्याने वीज जोडणी रखडली असून संपूर्ण पाणीपुरवठा योजना ठप्प पडली आहे. परिणामी, करोडो रुपयांची योजना उभी असतानाही तिचा लाभ ग्रामस्थांना मिळत नाही.
ऐन उन्हाळ्यात पाण्याची गरज सर्वाधिक असताना सुतारवाडीतील नागरिकांना रहाटाच्या सहाय्याने विहिरीतून पाणी काढून घरापर्यंत न्यावे लागत आहे. शासनाने घराघरांत नळाद्वारे पाणी पोहोचविण्याचे स्वप्न दाखवले; मात्र प्रत्यक्षात ग्रामस्थांच्या वाट्याला पाण्यासाठीची धावपळच आली आहे.

“विहिरीत पाणी आहे, योजना आहे, निधी खर्च झाला; मग नळातून पाणी का येत नाही?” असा संतप्त सवाल ग्रामस्थ उपस्थित करत आहेत. एका साध्या प्रशासकीय प्रक्रियेअभावी संपूर्ण योजना अडखळली असून नागरिकांना त्याची मोठी किंमत मोजावी लागत आहे.
ग्रामस्थांच्या मते, तातडीने वीज मीटर बसवून पाणीपुरवठा सुरू करणे आवश्यक आहे. अन्यथा जलजीवन मिशनसारखी महत्त्वाकांक्षी योजना केवळ कागदोपत्री यशस्वी ठरल्याची भावना अधिक तीव्र होईल.