एका गुन्ह्यात कारवाई टाळण्यासाठी मुंबईतील चारकोप पोलीस ठाण्यातील पोलीस उपनिरीक्षकाने पैसे आणि दारूची बाटली लाच म्हणून मागितली. त्याला एसीबीच्या अधिकाऱ्यांनी अटक केली.
मुंबई : गुन्ह्यात पुढे कारवाई टाळण्यासाठी तसेच इतरांना आरोपी न करण्यासाठी एका कंत्राटदाराकडे ४० हजारांची रोख रक्कम आणि दारूची बाटली मागणाऱ्या पोलिस उपनिरीक्षक आणि खासगी एजंटला अँटी करप्शन ब्युरोच्या अधिकाऱ्यांनी सोमवारी अटक केली.
भारत ढेंबरे असे या उपनिरीक्षकाचे नाव असून ते चारकोप पोलिस ठाण्यात नेमणुकीला आहेत. विनामास्क फिरणाऱ्या नागरिकांना पकडून त्यांच्यावर कारवाई करण्याचे काम कांदिवलीतील एका कंत्राटदाराला मिळाले होते. त्यानुसार कंपनीचे कर्मचारी क्लीनअप मार्शलचे काम करीत असताना, त्यांनी कांदिवलीच्या महावीर नगरमधील एका व्यक्तीवर कारवाई केली.
या कारवाईचा बदला घेण्यासाठी ही व्यक्ती काही नातेवाईक आणि मित्र मंडळींना घेऊन कंत्राटदाराच्या घरी पोहोचला. वादविवाद इतका वाढला की, त्याचे पर्यवसान हाणामारीत झाले. या हाणामारीत कारवाई करण्यात आलेल्या व्यक्तीच्या डोक्याला दुखापत झाल्याने कंत्राटदार आणि त्याच्या भावावर गुन्हा दाखल करण्यात आला. त्यांना अटक करून जामिनावर सोडण्यात आले. जप्त केलेले मोबाइल तसेच डीव्हीआर परत मिळावे यासाठी कंत्राटदाराने पोलिसांना संपर्क केला असता न्यायालयाचे कारण देण्यात आले.
कंत्राटदाराने उपनिरीक्षक भारत ढेंबरे यांच्या परिचयातील व्यक्तीशी संपर्क साधला आणि सर्व हकीकत सांगितली. जप्त केलेल्या वस्तू घेण्यासाठी २० हजार आणि या गुन्ह्यांत कंत्राटदाराच्या वडिलांना आरोपी न करण्यासाठी २० हजार तसेच एक दारूची बाटली द्यावी लागेल असे सांगितले. हे सर्व द्यायचे नसल्याने कंत्राटदाराने अँटी करप्शन ब्युरोकडे तक्रार केली. एसीबीच्या पथकाने तक्रारीची शहानिशा करून सापळा लावला आणि भारत ढेंबरे, खासगी व्यक्तीला २० हजार रुपये घेताना पकडण्यात आले.